जळगाव मिरर | ५ सप्टेंबर २०२६
रोझलॅण्ड इंग्लिश मीडियम हायस्कूल व रोझलॅण्ड प्राथमिक विद्यामंदिर, जळगाव येथे भारताचे माजी राष्ट्रपती, महान तत्त्वज्ञ व शिक्षणतज्ज्ञ डॉ. सर्वपल्ली राधाकृष्णन यांच्या जयंतीनिमित्त शिक्षक दिन मोठ्या उत्साहात व आनंदमय वातावरणात साजरा करण्यात आला.
कार्यक्रमाची सुरुवात मान्यवरांच्या हस्ते दीपप्रज्वलन करून डॉ. सर्वपल्ली राधाकृष्णन यांच्या प्रतिमेचे पूजन तसेच विद्येची देवता माता सरस्वतीचे पूजन करून करण्यात आली. या कार्यक्रमासाठी प्रमुख पाहुणे म्हणून प्रभाग क्रमांक ७ चे नगरसेवक श्री. विशालदादा सुरेश भोळे उपस्थित होते. त्यांच्या हस्ते विविध क्षेत्रांत उल्लेखनीय कामगिरी करणाऱ्या विद्यार्थ्यांना पारितोषिकांचे वितरण करण्यात आले.
यावेळी विद्यार्थ्यांनी शिक्षक दिनाचे महत्त्व अधोरेखित करणारी प्रभावी भाषणे, कविता तसेच विविध सांस्कृतिक कार्यक्रम सादर करून उपस्थितांची मने जिंकली. विद्यार्थ्यांनी आपल्या शिक्षकांप्रती कृतज्ञता व्यक्त करत त्यांच्या मार्गदर्शनाचे, संस्कारांचे आणि शिक्षण क्षेत्रातील अमूल्य योगदानाचे गौरवपूर्ण शब्दांत वर्णन केले.
याप्रसंगी शाळेच्या मुख्याध्यापकांनी आपल्या मनोगतात शिक्षक हे विद्यार्थ्यांच्या जीवनाला योग्य दिशा देणारे मार्गदर्शक असून, त्यांच्या ज्ञान, संस्कार व मार्गदर्शनातूनच उद्याचे सुजाण, सुसंस्कृत आणि जबाबदार नागरिक घडतात, असे प्रतिपादन केले. कार्यक्रमास शाळेतील सर्व शिक्षक, विद्यार्थी तसेच पालक मोठ्या संख्येने उपस्थित होते. विद्यार्थ्यांच्या उत्स्फूर्त सहभागामुळे संपूर्ण परिसर आनंद, उत्साह आणि कृतज्ञतेच्या भावनेने भारून गेला. कार्यक्रमाचा समारोप आभार प्रदर्शनाने करण्यात आला. शिक्षकांप्रती आदर व कृतज्ञतेची भावना व्यक्त करणारा हा कार्यक्रम अत्यंत उत्साहपूर्ण व संस्मरणीय वातावरणात संपन्न झाला.
