जळगाव मिरर | १९ सप्टेंबर २०२६
रोझलँड इंग्लिश मीडियम हायस्कूल येथे हिंदी दिवसानिमित्त शुक्रवार, दि. १९ सप्टेंबर २०२६ रोजी विद्यार्थ्यांसाठी विशेष हास्य कवी संमेलनाचे आयोजन करण्यात आले. हास्य, विनोद आणि सामाजिक संदेश यांचा सुंदर मिलाफ असलेल्या या कार्यक्रमाला विद्यार्थ्यांचा उत्स्फूर्त प्रतिसाद लाभला.
कार्यक्रमास प्रमुख पाहुण्या म्हणून डॉ. प्रा. क्षमा सराफ उपस्थित होत्या. त्यांच्या हस्ते दीपप्रज्वलन करून कार्यक्रमाचे उद्घाटन करण्यात आले. *संस्थेच्या अध्यक्षा महोदया सौ. रोजमीन खिमाणी प्रधान यांचीही यावेळी विशेष उपस्थिती होती. कार्यक्रमाचे सूत्रसंचालन इयत्ता आठवी व नववीच्या विद्यार्थिनी सान्वी साबळे, वेदश्री टेंबरे व डिंपल परिहार यांनी आत्मविश्वासपूर्ण व प्रभावी शैलीत केले. विद्यार्थ्यांनी विविध हास्यकवितांचे उत्कृष्ट सादरीकरण करून उपस्थितांना मनमुराद हसविले.
या कार्यक्रमाचे विशेष आकर्षण ठरले ते ‘हिंदी की अदालत’ या छोटेखानी नाटिकेचे. विद्यार्थ्यांनी आपल्या अभिनयातून हिंदी भाषेच्या शब्दांचे सौंदर्य आणि भाषेचे महत्त्व प्रभावीपणे मांडले. हास्यकवितांमधून केवळ मनोरंजन न करता विद्यार्थ्यांनी विविध सामाजिक व आरोग्यविषयक संदेशही दिले. मोबाईल आणि दूरदर्शनचा अतिरेक टाळावा, जीवनसत्त्वयुक्त फळे व पौष्टिक खाद्यपदार्थांचा आहारात समावेश करावा, असा संदेश देणाऱ्या कवितेचे प्रभावी सादरीकरण हुरेन खान यांनी केले. इतर विद्यार्थ्यांनीही आपल्या कवितांमधून स्वच्छता, आरोग्य, चांगल्या सवयी आणि सामाजिक जाणीव यांसारखे विविध संदेश मनोरंजक पद्धतीने मांडले.
विद्यार्थ्यांच्या सादरीकरणातील विनोदबुद्धी, अभिनयकौशल्य, भाषेवरील प्रभुत्व आणि आत्मविश्वास यांचे प्रमुख पाहुण्यांनी व संस्था अध्यक्ष महोदया. सौ रोजमिन खिमानी प्रधान यांनी कौतुक केले. हास्याच्या माध्यमातून विद्यार्थ्यांना हिंदी भाषेची गोडी लागावी आणि सामाजिक विषयांबाबत त्यांच्यात जाणीव निर्माण व्हावी, हा या उपक्रमामागील उद्देश होता. ‘हास्याच्या फुलांनी सजली हिंदीची मैफल आणि संदेशांनी समृद्ध झाले विद्यार्थ्यांचे मन’ अशा उत्साहपूर्ण वातावरणात हिंदी दिवसानिमित्त आयोजित हे हास्य कवी संमेलन संस्मरणीय ठरले.
