जळगाव मिरर | ९ ऑक्टोबर २०२६
जिल्ह्यातील अवैध वाळू साठा प्रकरणात जिल्हा प्रशासनाने कठोर भूमिका घेत कानळदा येथील मंडळ अधिकारी छाया कोळी यांना निलंबित केले आहे. जिल्हाधिकारी रोहन घुगे यांनी हा आदेश जारी केला आहे. या कारवाईमुळे महसूल यंत्रणेत खळबळ उडाली असून अवैध वाळू उपसा आणि वाहतुकीला पाठीशी घालणाऱ्या घटकांना प्रशासनाने स्पष्ट इशारा दिल्याची चर्चा आहे.
ऑगस्ट महिन्यात जिल्हाधिकारी रोहन घुगे आणि पोलीस अधीक्षक श्रीकांत धिवरे यांनी कानळदा शिवारातील गिरणा नदीकाठ परिसराची प्रत्यक्ष पाहणी केली होती. दुचाकी व पायी नदीपात्रात उतरून त्यांनी परिस्थितीचा आढावा घेतला होता. पाहणीदरम्यान मोठ्या प्रमाणावर अवैध वाळू साठे आढळून आल्याने संबंधित यंत्रणांना तत्काळ कारवाईचे निर्देश देण्यात आले होते. त्यानुसार हे वाळू साठे जप्त करण्यात आले होते.
पाहणीदरम्यान जिल्हाधिकारी व पोलीस अधीक्षक यांनी कानळदा, खेडी आणि परिसरातील विविध नदीकाठ भागांना भेटी देत ग्रामस्थांशी संवाद साधला होता. अवैध वाळू वाहतुकीमुळे निर्माण होणारे प्रश्न, महसुलाचे नुकसान आणि पर्यावरणीय परिणाम याबाबत चर्चा करत त्यांनी स्थानिक नागरिकांनाही सहकार्याचे आवाहन केले होते. यावेळी संबंधित महसूल अधिकाऱ्यांची कानउघडणी करत वाळू माफियांविरोधात कोणतीही तडजोड न करता कठोर कारवाई करण्याचे निर्देश देण्यात आले होते.
जिल्हाधिकारी रोहन घुगे यांनी अवैध वाळू उपसा, वाहतूक आणि साठवणुकीबाबत ‘झिरो टॉलरन्स’ धोरण राबविण्याचा निर्धार व्यक्त केला होता. त्याच भूमिकेचा भाग म्हणून मंडळ अधिकारी छाया कोळी यांच्याविरोधात निलंबनाची कारवाई करण्यात आल्याचे मानले जात आहे. या कारवाईमुळे महसूल विभागातील अधिकारी व कर्मचाऱ्यांमध्ये जबाबदारीची जाणीव अधिक तीव्र होणार असल्याचे बोलले जात आहे. दरम्यान, गेल्या वर्षभरात जळगाव जिल्हा महसूल प्रशासनाने अवैध गौण खनिज उत्खनन आणि वाहतुकीविरोधात राज्यातील सर्वाधिक कारवाया केल्या आहेत. जिल्ह्यात ७०० हून अधिक कारवाया करण्यात आल्या आहेत.
दुष्काळी आढावा दौऱ्यादरम्यान महसूल मंत्री चंद्रशेखर बावनकुळे यांच्याकडे जिल्ह्यातील अवैध वाळू उत्खनन व वाहतुकीबाबत अनेक तक्रारी प्राप्त झाल्या असल्याची माहिती त्यांनी दिली. अवैध वाळू व्यवसायात सहभागी असलेल्या घटकांवर तसेच त्यांना पाठबळ देणाऱ्या अधिकारी व कर्मचाऱ्यांवर कठोर कारवाई करण्यात येईल, असा इशाराही त्यांनी दिला.
