जळगाव मिरर | १५ ऑक्टोबर २०२६
चाळीसगाव शहरातील एका १३ वर्षीय अल्पवयीन मुलीचा लैंगिक छळ करण्यासह तिच्यावर लैंगिक अत्याचार केल्याच्या गंभीर आरोपांप्रकरणी तिघांविरुद्ध गुन्हा दाखल करण्यात आला आहे. तर, सोशल मीडियाच्या माध्यमातून अश्लील संदेश पाठवणे, धमक्या देणे तसेच नग्न छायाचित्रांची मागणी केल्याचेही पीडितेने पोलिसांना दिलेल्या जबाबात नमूद केले आहे.
पोलिसांनी दिलेल्या माहिती व पीडित मुलीच्या तक्रारीनुसार, सप्टेंबर २०२६ मध्ये वेगवेगळ्या प्रसंगी तिच्यासोबत अनुचित प्रकार घडल्याचा आरोप आहे. यातील एका संशयिताने घरात बोलावून जवळीक साधण्याचा प्रयत्न केल्याचे, तर दुसऱ्या संशयिताने धमकी देऊन तिच्यावर इच्छेविरुद्ध लैंगिक अत्याचार केल्याचे तक्रारीत म्हटले आहे. तसेच इन्स्टाग्रामवरून अश्लील संदेश पाठवून बोलण्यास भाग पाडणे, शाळेतून पळवून नेण्याची तसेच पीडितेला आणि तिच्या कुटुंबीयांना जीवे मारण्याची व गायब करण्याची धमकी दिल्याचेही तक्रारीत नमूद आहे. आणखी एका संशयिताने सोशल मीडियावरून अश्लील रील पाठवणे, वारंवार संपर्क साधणे आणि धमक्या देऊन नग्न छायाचित्रे मागितल्याचा आरोप आहे. दरम्यान, पीडित मुलीच्या आईला मोबाईलवरील हे संदेश आढळल्यानंतर हा प्रकार उघडकीस आला. त्यानंतर पीडितेच्या बहिणीने तिच्याकडे विचारपूस केली असता तिने आपल्यासोबत घडलेल्या घटनांची माहिती दिली. त्यानंतर कुटुंबीयांनी पोलिसांत धाव घेत तक्रार नोंदवली आहे. या प्रकरणाचा तपास उपविभागीय पोलीस अधिकारी विजयकुमार ठाकूरवाड यांच्याकडे सोपवण्यात आला आहे. अल्पवयीन मुलीशी संबंधित हे प्रकरण गंभीर असून, तपासादरम्यान पुढील बाबी स्पष्ट होणार आहेत.
