धरणगाव : प्रतिनिधी
युवासेना प्रमुख आदित्य ठाकरे यांचा आज धरणगावात ज्या मार्गाने आगमन होणार आहे. त्याच मार्गावरील बॅनर फाडल्याची धक्कादायक घटना शुक्रवारी मध्यरात्री घडली. यामुळे काही काळ मोठा तणाव निर्माण झाला होता.
“शिव संवाद” यात्रा दौरा आज दि.२० ऑगस्ट, शनिवारी दुपारी १ वाजता धरणगाव शहरात छत्रपती शिवाजी महाराजांच्या स्मारकजवळ आयोजित केला आहे. यानिमित्ताने धरणगाव शहरात शिवसेना व युवा सेना कडून आदित्य ठाकरे यांचे स्वागत बॅनर जागोजागी लावले आहेत. शुक्रवारी मध्यरात्री काही अज्ञातांकडून शहरातील गणेश नगर, हेडगेवार नगर, व उड्डाण पुलाजवळ शिव संवाद यात्रेचे स्वागत बॅनरवर नेते, पदाधिकारी व कार्यकर्त्यांचे बॅनर फाडल्याचा प्रकार पाहायला मिळाला. जवळपास सहा ते सात ठिकाणी हे बॅनर फाडण्यात आल्याचे कळतेय. द्वेष भावनेतून शिवसेना, युवासेनेचे स्वागत फलक (बॅनर) फाडल्याचा संशय शिवसैनिकांनी व्यक्त केला असून, या घटनेमुळे शिवसेना पदाधिकारी आणि कार्यकर्त्यांनी रोष व्यक्त केला आहे. सदर घटनेची माहिती मिळताच धरणगाव पोलिस ठाण्याचे निरीक्षक राहुल खताळ व कर्मचारी यांनी घटनास्थळी जावून पाहणी केली. यावेळी शिवसेनेचे सहसंपर्क प्रमूख गुलाबराव वाघ, नगराध्यक्ष निलेश चौधरी, माजी उपनगराध्यक्ष देविदास बापू महाजन, नगरसेवक वासुदेव चौधरी, भागवत चौधरी, किरण अग्निहोत्री, रविंद्र जाधव, भरत माळी आदी पदाधिकाऱ्यांनी कार्यकर्त्यांना शांत राहण्याचा सूचना दिल्या.
बॅनर फाडणाऱ्यांचा मध्यरात्री शोधाशोध
युवासेना प्रमुख आदित्य ठाकरे यांचे स्वागतपर लावलेले बॅनर फाडल्याचा प्रकार लक्षात येताच संतप्त शिवसैनिकांनी समाज कंटकांचा शोध घेतला. परंतू कुणीही मिळून आले नाही. पोलिसांनी देखील परिसर पिंजून काढला. परंतू कुणीही आढळून आले नाही. दरम्यान, पोलिसात याबाबत एनसी दाखल असल्याचे कळते.
‘त्या’ विरुद्ध गुलाबराव वाघ यांनी दिली धरणगाव पोलिसात तक्रार
शहरातील आज ‘शिव संवाद’ यात्रेच्या निमित्त शिवसेना युवा नेते आदित्य ठाकरेंचे गावात लावलेले बॅनर फाडणाऱ्याविरुद्ध शिवसेना सहसंपर्क प्रमुख गुलाबराव वाघ यांनी धरणगाव पोलिसात तक्रार दिली आहे.
गुलाबराव वाघ यांनी पोलिसात दिलेल्या तक्रारीत म्हटले आहे की, आज दि. २० ऑगस्ट २०२२ रोजी दुपारी १ वाजता युवा सेना प्रमुख माजी पर्यावरण मंत्री अदित्य ठाकरे यांचा शिवसंवाद यात्रा कार्यक्रम असल्याने सदर कार्यक्रमानिम्मीत्ताने शहरात ठिक ठिकाणी बॅनर लावण्यात आलेले आहे. सदर बँनवर माजी मुख्यमंत्री शिवसेना पक्ष प्रमुख उद्धव ठाकरे व आदित्य ठाकरे तसेच कार्यकर्त्यांचे फोटो लावण्यात आले होते. धरणगाव-एरंडोल रोडावरील गणेश नगर स्टॉप येथे लावण्यात आलेले आमदार आदित्य ठाकरे यांचे शिवसंवाद यात्रेचे बॅनर दिनांक २० ऑगस्ट रोजी रात्री १.३० वाजेच्या सुमारास शिवसेना विरोधकांनी नेत्यांचे बॅनर फाडून एक प्रकारे शिवसैनिकांच्या भावना दुखावलेल्या आहेत. दोन विचारसारणीच्या लोकांमध्ये तेढ निर्माण होऊन कायदा व सुव्यवस्थेचा प्रश्न निर्माण करणा-या समाज कंठकाविरुध्द तसेच त्याला मदत करणा-या प्रवृत्तीचा शोध होवुन त्याच्या विरुध्द गुन्हा दाखल करण्यात यावा, असेही श्री. वाघ यांनी तक्रारीत म्हटले आहे. या प्रकरणी धरणगाव पोलिसात अदखलपात्र गुन्ह्याची नोंद करण्यात आली आहे. तसेच आज प्रत्यक्ष सभेच्या वेळी कोणताही अनुचित प्रकार घडू नये, यासाठी अतिरीक्त पोलिस बंदोबस्त वाढवण्यात आला आहे. अशी माहिती पोलिस निरीक्षक राहुल खताळ यांनी दिली आहे.
