पुणे : वृत्तसंस्था
राज्य माध्यमिक व उच्च माध्यमिक शिक्षण मंडळातर्फे घेण्यात येणाऱ्याराज्य माध्यमिक शालांत परीक्षा (इयत्ता दहावी) आणि उच्च माध्यमिक (इयत्ता बारावी) परीक्षांचे संभाव्य वेळापत्रक राज्य बोर्डाकडून सोमवारी जाहीर करण्यात आले आहे. संभाव्य वेळापत्रकानुसार बोर्डाची दहावीची परीक्षा २ मार्च ते २५ मार्च २०२३ दरम्यान होणार आहे. बारावीची बोर्डाची परीक्षा २१ फेब्रुवारी ते २० मार्च २०२३ दरम्यान होणार आहे.
दरवर्षी राज्य बोर्डाकडून आयोजित करण्यात येणाऱ्या या दोन्ही परीक्षांना सुमारे १७ लाख विद्यार्थी सामोरे जातात. ‘विद्यार्थ्यांना अभ्यासाचे नियोजन योग्य पद्धतीने करता यावे तसेच अनावश्यक ताणापासून मुक्तता मिळावी, या उद्देशाने बोर्डाने संभाव्य वेळापत्रक जाहीर केले आहे. योग्य वेळी अंतिम वेळापत्रक बोर्डाकडून जाहीर केले जाईल. ते संबंधित शाळा तसेच कनिष्ठ महाविद्यालयांना अधिकृतरित्या कळवले जाईल.
अफवांवर विश्वास ठेवू नका
विद्यार्थ्यांनी अन्य कोणत्याही माध्यमातून आलेल्या तारखा, वेळापत्रके यावर विश्वास ठेऊ नये. फक्त शाळा आणि कनिष्ठ महाविद्यालय यांना पाठवलेले आणि राज्य मंडळाच्या अधिकृत संकेतस्थळावर दिलेले वेळापत्रक ग्राह्य धरावे, असे बोर्डाच्या सचिव अनुराधा ओक यांनी सांगितले.
सूचना, हरकती १५ दिवसांत कळवा
याशिवाय दहावी आणि बारावी बोर्डाच्या प्रात्यक्षिक, तोंडी परीक्षा, श्रेणी तसेच अन्य विषयांचे वेळापत्रकदेखील स्वतंत्रपणे कळवले जाईल. या संदर्भातील सूचना, हरकती बोर्डाकडे १५ दिवसांत लेखी कळवाव्यात, असेही आवाहन बोर्डातर्फे करण्यात आले आहे.
