जळगाव मिरर | २२ सप्टेंबर २०२३
राज्यात गेल्या काही दिवसापासून एका लाच घेतल्या प्रकरणी एका महिला अधिकाऱ्याला अटक केल्यानंतर मोठी चर्चा सुरु झालेली आहे. दोन वर्षांपासून बंद असलेल्या कंपनीचा व्यवसायकर रद्द करून देण्याच्या मोबदल्यात चार हजार रुपयांची लाच स्वीकारतांना स्नेहल सुनील ठाकूर (५२) या महिला अधिकाऱ्यास लाचलुचपत प्रतिबंधक विभागाने रंगेहाथ अटक केली होती. त्यानंतर त्यांना न्यायालयात हजर केले असता न्यायालयाने १४ दिवसाची न्यायालयीन कोठडी सुनावली आहे.
मिळालेल्या माहितीनुसार, व्यवसाय कर अधिकारी कार्यालयात कार्यरत असलेल्या स्नेहल सुनिल ठाकूर (वय ५२) असे लाचखोर अधिकाऱ्याचे नाव असून तक्रारदाराने त्यांची कल्पदीप इंडस्ट्रियल सिक्युरिटी सर्व्हिसेस ही कंपनी दोन वर्षांपासून बंद असल्याने तिचा व्यवसाय कर रद्द व्हावा यासाठी १३ सप्टेंबर रोजी व्यवसाय कर अधिकारी यांच्या कार्यालयात अर्ज केला होता.व्यवसाय कर रद्द करून द्यायच्या मोबदल्यात स्नेहल ठाकूर यांनी तक्रारदार यांच्याकडे ५ हजारांची मागणी केली. तडजोडीअंती ४ हजार रुपये देण्याचे ठरले. तक्रारदाराने लाचलुचपत प्रतिबंधक विभागाशी संपर्क साधून तक्रार दिली. त्यानंतर तक्रारीची शहानिशा केल्यावर लाचलुचपत प्रतिबंधक विभागाच्या पथकाने व्यवसाय कर कार्यालयात सापळा रचून तक्रारदाराकडून लाचेची ४ हजार रुपयांची रक्कम स्वीकारतांना स्नेहल ठाकूर यांना रंगेहाथ अटक केली होती.
नाशिक शहर, जिल्ह्यात लाचखोरीचे प्रमाण वाढले असून अनेक प्रकरण राज्यभर आणि अधिवेशनात गाजलेले असताना देखील प्रशासनातील भ्रष्ट कर्मचारी अधिकारी लाचखोरीचा कळस गाठत आहेत. आता चार हजार रुपयांची लाच घेतल्याप्रकरणी व्यवसाय कर अधिकारी स्नेहल ठाकूर यांना १४ दिवसांची न्यायालयीन कोठडी देण्यात आली आहे.
