जळगाव मिरर । १४ जानेवारी २०२३ ।
जामनेर तालुक्यातील पहुर येथील बंद घर फोडून सोन्याचे दागिने व रोकड असा लाखो रूपये किंमतीचा मुद्देमाल लांबविणाऱ्या टोळीचा जळगाव स्थानिक गुन्हे शाखेच्या पथकाने पर्दाफाश केला असून या गुन्ह्यातील पाच संशयित आरोपींना शुक्रवारी स्थानिक गुन्हे शाखेने अटक केली आहे. यात एका महिलेचा समावेश आहे. ज्याच्या घरी घरफोडी झाली होती, ते अटकेतील महिलेचे मामेभाऊ होते, मामेभावाकडे मोठ्याप्रमाणावर दागिणे व रोकड असल्याची माहिती महिलेने तिच्या पतीला व पतीच्या मित्रांना दिली होती. त्यानुसार महिलेसह इतर चौघांनी नियोजनबध्द रितीने ही घर फोडी केल्याचे तपासात समोर आले असून संशयितांनी गुन्ह्याची कबूली दिली आहे. त्यांच्याकडून चोरीपैकी १६ लाख ९० हजार रुपये किमतीचा मुद्देमाल हस्तगत करण्यात आला आहे.
जामनेर तालुक्यातील पहुर येथे एकाचे बंद घर फोडून सुमारे लाखो रूपये किंमतीचा सोन्याचे दागिने व रोकड असा मुद्देमाल चोरून नेल्याची धक्कादायक घटना घडली होती. या संदर्भात पहूर पोलीस ठाण्यात २९ ऑगस्ट २०२१ रोजी गुन्हा दाखल करण्यात आला होता. जळगाव जिल्हा पोलीस अधीक्षक एम. राजकुमार, अप्पर पोलीस अधीक्षक चंद्रकांत गवळी, रमेश चोपडे, जळगाव स्थानिक गुन्हे शाखेचे पोलीस निरीक्षक किसन नजन पाटील यांना मिळालेल्या गोपनीय माहितीनुसार पहूर येथे धाडसी घरफोडी करणारे संशयित आरोपी हे जळगाव शहरातील असल्याची खात्रीलायक माहिती मिळाली. त्यानुसार स्थानिक गुन्हे शाखेच्या पथकाने कारवाई करत सय्यद सरजील सय्यद हरून (वय २७, रा. मास्टर कॉलनी जळगाव), अनिल रमेश चौधरी (वय ४०, रा. अयोध्या नगर जळगाव). सय्यद अराफत सय्यद फारूक (वय-३३, रा. तांबापूरा), सय्यद अमीन उर्फ बुलेट सय्यद फारुख (रा. तांबापुरा) आणि भावना जवाहरलाल जैन (लोढा) वय ४० रा. रायसोनी नगर, जळगाव या पाच जणांना अटक केली. त्यांच्याकडून चोरीला गेलेल्या रकमेपैकी १६ लाख ९० हजाराचा मुद्देमाल हस्तगत केला आहे. पाचही जणांना पुढील कारवाईसाठी पहूर पोलिसांच्या ताब्यात देण्यात आले आहे.
ज्यांच्याकडे घरफोडी झाली होती ते अटकेतील संशयित भावना जैन हिचे मामेभाऊ आहेत. भावना ही काही दिवसांपूर्वी मामेभावाकडे पहूर येथे गेली होती… त्यानुसार भावना हिनेच तिच्या पतीसह त्याच्या मित्रांना पहूर येथील मामेभावाकडे भरपूर सोन्याचे दागिणे व रोख असल्याची माहिती दिली होती. मी स्वतः ते बघितले आहेत. ते सध्या गावाला गेले आहेत, कुलूप तोडून दागिने व पैसे चोरी करा, आपण सर्व वाटून घेवू असे भावना हिने सांगितले होते. त्यानुसार टीप मिळाल्यानंतर भावना जैन व इतरांनी कारने पहूर येथे जावून घर फोडले होते. यात दागिने व रोकड असा मुद्देमाल तांबविता होता. बोरीनंतर सर्व संशयितांनी सोन्याचे दागिणे हे भावना जेन हिच्याकडे दिले होते, असे सांगत संशयितांनी गुन्ह्याची कबूली दिली आहे.
जळगाव जिल्हा पोलीस अधीक्षक एम. राजकुमार, अप्पर पोलीस अधीक्षक चंद्रकांत गवळी, रमेश चोपडे, जळगाव स्थानिक गुन्हे शाखेचे पोलीस निरीक्षक किसन नजन पाटील यांच्या मार्गदर्शनाखाली स्थानिक गुन्हे शाखेचे सहाय्यक फोजदार अनिल जाधव, रवी नरवाडे, पोलीस हेडकॉन्स्टेबल संजय हिवरकर, विजयसिंह पाटील, राजेश मेढे, सुधाकर अंभोरे, कमलाकर बागुल, अनिल देशमुख, अक्रम शेख, पोलीस नाईक संतोष मायकल, नितीन बाविस्कर, नंदतात पाटील, विजय पाटील, भगवान पाटील, श्रीकृष्ण देशमुख, परेश महाजन, विनोद पाटील, सचिन महाजन, ईश्वर पाटील, महिला पोलीस कॉन्स्टेबल अभिलाषा मनोरे, वैशाली सोनवणे, अश्विनी सावकारे आणि रूपाली खरे यांच्या पथकाने या लाखो रुपयांच्या या घरफोडीचा पर्दाफाश केला आहे. तर सपोनी वसंत कांबळे, पोउनि सचिन डोंगरे, पोहेकॉ जयंत चौधरी, पोना विनायक पाटील, पोना किशोर मोरे, पोना सचिन चौधरी यांनी तांत्रिक सहकार्य केले.
