राष्ट्रपती द्रौपदी मुर्मू यांचा आदेश; देशातील अनेक राज्यांमध्ये राज्यपालपदावर नवी नियुक्ती
जळगाव मिरर | ६ मार्च २०२६
देशाच्या राजकारणात महत्त्वाच्या घडामोडी घडल्या असून राष्ट्रपती द्रौपदी मुर्मू यांच्या आदेशानुसार देशातील अनेक राज्यांमध्ये राज्यपालांच्या नियुक्त्या आणि बदल्या करण्यात आल्या आहेत. या निर्णयानुसार तेलंगणाचे राज्यपाल असलेले जिष्णू देव वर्मा यांची महाराष्ट्राच्या राज्यपालपदी नियुक्ती करण्यात आली आहे. त्यामुळे आता महाराष्ट्राला नवे राज्यपाल मिळाले आहेत.
मिळालेल्या माहितीनुसार जिष्णू देव वर्मा हे यापूर्वी तेलंगणा राज्याचे राज्यपाल म्हणून कार्यरत होते. आता त्यांच्यावर महाराष्ट्र राज्याच्या राज्यपालपदाची जबाबदारी सोपवण्यात आली आहे. त्यांच्या जागी शिव प्रताप शुक्ला यांची तेलंगणाच्या राज्यपालपदी नियुक्ती करण्यात आली आहे.
जिष्णू देव वर्मा यांचा जन्म 15 ऑगस्ट 1957 रोजी झाला. ते मूळचे त्रिपुरा राज्यातील असून त्रिपुराच्या राजघराण्याशी त्यांचा संबंध आहे. 1990 च्या दशकात त्यांनी भारतीय जनता पक्षात प्रवेश करून सक्रिय राजकारणाला सुरुवात केली. त्या काळात त्रिपुरामध्ये डाव्या पक्षांचे वर्चस्व असतानाही भाजपाची संघटना मजबूत करण्यासाठी त्यांनी सातत्याने काम केले.
राजकीय कारकिर्दीत त्यांनी अनेक निवडणुका लढवल्या. 1996, 1998 आणि 1999 मध्ये त्यांनी त्रिपुरा पूर्व लोकसभा मतदारसंघातून लोकसभा निवडणूक लढवली. त्या काळात त्रिपुरामध्ये भाजपचा प्रभाव वाढवण्यासाठी त्यांनी मोठ्या प्रमाणावर काम केले. राज्यात भाजपचा प्रचार आणि प्रसार वाढवण्यासाठी त्यांनी संघटनात्मक पातळीवर प्रयत्न केले.
त्रिपुरामध्ये भाजप सत्तेत आल्यानंतर जिष्णू देव वर्मा यांनी राज्याचे उपमुख्यमंत्री म्हणूनही काम केले. या काळात त्यांनी वित्त, ऊर्जा आणि ग्रामविकास यांसारख्या महत्त्वाच्या खात्यांची जबाबदारी सांभाळली. राज्याच्या आर्थिक नियोजनात तसेच ग्रामीण पायाभूत सुविधांच्या विकासात त्यांनी महत्त्वाची भूमिका बजावली. त्यामुळे त्रिपुराच्या प्रशासनात त्यांचे योगदान महत्त्वाचे मानले जाते.
दरम्यान, राष्ट्रपतींच्या आदेशानुसार इतरही काही राज्यांमध्ये राज्यपालपदी नियुक्त्या करण्यात आल्या आहेत. नंद किशोर यादव यांची नागालँडच्या राज्यपालपदी नियुक्ती करण्यात आली आहे. तसेच लेफ्टनंट जनरल (निवृत्त) सय्यद अता हसनैन यांची बिहारचे राज्यपाल म्हणून नियुक्ती करण्यात आली आहे.
तसेच सध्या तामिळनाडूचे राज्यपाल असलेले आर. एन. रवी यांची पश्चिम बंगालच्या राज्यपालपदी बदली करण्यात आली आहे. राजेंद्र अरळेकर यांच्याकडे हिमाचल प्रदेशच्या राज्यपालपदाची अतिरिक्त जबाबदारी सोपवण्यात आली आहे. याशिवाय कविंदर गुप्ता यांची हिमाचल प्रदेशच्या राज्यपालपदी नियुक्ती करण्यात आली आहे. वी. कुमार सक्सेना यांची लडाखच्या उपराज्यपालपदी नियुक्ती करण्यात आली असून तरनजीत सिंह संधू हे दिल्लीचे नवे उपराज्यपाल असतील.
देशातील विविध राज्यांमध्ये करण्यात आलेल्या या व्यापक बदलांमुळे प्रशासकीय पातळीवर नवे नेतृत्व पुढे येणार असून केंद्र सरकारच्या या निर्णयाकडे राजकीय वर्तुळात विशेष लक्ष लागले आहे.
