जळगाव मिरर | ३० नोव्हेबर २०२३
उत्तर चीनमधील मुलांमध्ये वेगाने पसरणाऱ्या श्वसनाशी संबंधित रहस्यमयी न्यूमोनियाच्या पार्श्वभूमीवर सहा राज्यांनी आपल्या आरोग्य यंत्रणेला अलर्ट केले आहे. यात राजस्थान, कर्नाटक, गुजरात, उत्तराखंड, हरयाणा आणि तामिळनाडू या राज्यांचा समावेश आहे. केंद्र सरकारने नुकतेच सर्व राज्य व केंद्रशासित प्रदेशांना सार्वजनिक आरोग्य व्यवस्थेच्या सज्जतेचा आढावा घेण्याचे निर्देश दिले होते.
सहा राज्यांनी रुग्णालय व आरोग्य यंत्रणेला श्वसनाशी संबंधित रुग्णांवर उपचार करण्यासाठी सज्ज राहण्यास सांगितले आहे. यासोबत लोकांना गर्दीच्या ठिकाणी मास्क वापरण्याबरोबर हात स्वच्छ धुण्याचा आणि चेहऱ्याला हात लावणे टाळण्याचा सल्ला देण्यात आला आहे. बालरुग्ण विभागात बालकांवर उपचार करण्याची सर्व व्यवस्था सज्ज ठेवण्याचे निर्देश देण्यात आले आहेत.
चीनमध्ये रहस्यमयी न्यूमोनियाचा वेगाने प्रसार होत आहे. या आजारामुळे दररोज जवळपास ७ हजार बालके रुग्णालयात दाखल होत आहेत. कोरोनाप्रमाणे हा आजारदेखील संसर्गजन्य असल्याचे तज्ज्ञांचे म्हणणे आहे. देशात अद्याप तरी या आजाराचा एकही रुग्ण आढळला नाही; पण खबरदारी म्हणून केंद्र सरकारने रविवारी सर्व राज्य व केंद्रशासित प्रदेशांना तत्काळ आपापल्या सार्वजनिक आरोग्य व्यवस्थेच्या सज्जतेचा आढावा घेण्याचे निर्देश दिले होते. केंद्राकडून सातत्याने या आजाराच्या स्थितीवर लक्ष ठेवले जात आहे.
