अमळनेर : विक्की उत्तम जाधव
राष्ट्रवादीचे नेते अजित पवार यांच्यासोबत अमळनेर मतदार संघातील आ.अनिल पाटील यांनी थेट शिंदे व फडणवीस यांच्या सरकारमध्ये सहभागी झाल्याने अमळनेर शहरात आता राष्ट्रवादीत दोन गट पडल्याचे दिसत आहे. अमळनेर शहरातील राष्ट्रवादीचे तालुकाध्यक्ष सचिन पाटील यांच्यासह काही कार्यकर्त्यांनी आ.अनिल पाटील गद्दार म्हणत जाहीर निषेध नोंदविला आहे.
अमळनेरच्या भूमिपुत्राचा निषेध, ‘एकच साहेब शरद पवार साहेब’ अशा घोषणा देत लक्ष अमळनेर करांचे वेधून घेतले. अजित पवार यांच्यासह काही आमदार राष्ट्रवादीतून फुटून शिंदे आणि भाजप सरकारमध्ये सहभागी होत राजकीय भूकंप केला होता. त्यामुळे या राजकीय नाट्याचे पडसाद राष्ट्रवादीच्या राज्यभरातील कार्यकर्त्यांमध्ये पडले आहेत. त्यात राष्ट्रवादीचे दोन गट पडले असून काहीनी शरद पवार यांच्या सोबतच राहत आपली निष्ठा दाखवली आहे. तर शिंदे आणि भाजप सरकारमध्ये सहभागी झालेल्यांना गद्दाराचा ठपका ठेवला जात आहे. त्यात अमळनेररात मंत्री पद मिळूनही राष्ट्रवादी काँग्रेसमध्ये दोन गट निर्माण झाल्या नंतर एक गट मंत्री अनिल पाटील यांच्यासोबत गेला तर तालुकाध्यक्ष सचिन पाटील यांनी कार्यकर्त्यांसोबत भूमीपुत्राचा निषेध केला. मी शरदचंद्र पवारांसोबत असे लिहलेल्या टोप्या घालून सायंकाळी तालुकाध्यक्ष सचिन पाटील, सचिन वाघ, हर्षल पाटील, संदेश पाटील यांच्यासह कार्यकर्ते महाराणा प्रताप चौकात एकत्र येऊन घोषणाबाजी केली. अमळनेरच्या भूमिपुत्राचा निषेध, एकच साहेब, शरद पवार साहेब अशा घोषणा देण्यात आल्या. त्यामुळे आगामी निवडणुकीत याचे वेगळे परिणाम दिसून येतील, आणि अनिल पाटील यांना याचा चांगलाच फटका बसेल असे राजकिय वर्तुळात चर्चिले जात आहे.
