जळगाव मिरर / ९ मार्च २०२३ ।
शहरातील वाघ नगरातील रहिवासी असलेल्या पूनम प्रभाकर जाधव (वय ३८) या देवदर्शन घेऊन घराकडे निघालेल्या असतांना रस्त्यात अडवून एकाने काहीही कारण नसताना तिच्या डोक्यात लोखंडी रॉड टाकून मारहाण केल्याची घटना सोमवारी सकाळी ११ वाजता रामानंदनगर घाटाजवळ घडली. याप्रकरणी रामानंदनगर पोलिस ठाण्यात मंगळवारी गुन्ह्याची नोंद करण्यात आली आहे.
वाघनगर येथील पूनम जाधव या सोमवारी सकाळी त्यांच्या दुचाकीने रामानंदनगरातील टाकीजवळील महादेव मंदिरामध्ये देवदर्शनासाठी आल्या होत्या. देवदर्शन घेऊन ११ वाजेच्या सुमारास त्या घराकडे निघाल्या. रामानंदनगर घाटाजवळ त्यांना एकाने थांबविले. काहीही कारण नसताना त्याने महिलेला शिवीगाळ करून मारहाण केली. नंतर दुकानातून लोखंडी रॉड काढून महिलेच्या डोक्यात मारला. यात महिला ही गंभीर जखमी झाली. हा प्रकार कळल्यानंतर पोलिसांनी घटनास्थळी धाव घेऊन महिलेला पोलिस ठाण्यात नेले. त्यानंतर वैद्यकीय उपचारार्थ जिल्हा रुग्णालयात दाखल केले. मंगळवारी महिलेच्या जबाबावरून रामानंदनगर पोलिस ठाण्यात मारहाण करणाऱ्या तरुणाविरुद्ध गुन्ह्याची नोंद करण्यात आली आहे. पुढील तपास उषा सोनवणे करीत आहेत.
