जळगाव मिरर | ३० सप्टेंबर २०२३
जगभरात होत असलेल्या अशा अविश्वसनीय घटना ऐकून अवाक् होण्याची कधी कधी वेळ येते. आता यावर विश्वास ठेवायचा की नाही, हा एक प्रश्न मनात काहूर माजवतो. कोणतीही व्यक्ती एकदा मृत झाली की पुन्हा जिवंत राहणे केवळ अन् केवळ अशक्य. पण लालफितीच्या कारभारामुळे एका महिलेला कागदोपत्री मृत दाखवण्याचा ‘महा’ पराक्रम उघडकीस आला.
‘डेली स्टार’च्या अहवालानुसार, अमेरिकेमधील ‘सरकारी’ चमत्कारामुळे एका महिलेला जिवंतपणीच मृत घोषित करण्यात आल्याने एकच खळबळ उडाली. सेंट लुईजमध्ये राहणाऱ्या या महिलेचे नाव मेंडोलिन – मिशेल कार्थेन असे आहे. कोणत्या एका सरकारी ‘बाबू’च्या बेजबाबदार आणि निष्काळजीपणामुळे या महिलेला अकारण त्रास सहन करावा लागला. मेंडोलिन हिला २००७ मध्ये अमेरिकन सरकारच्या वतीने न कळतपणे सामाजिक सुरक्षेसाठी एक नंबर दिला होता. नेमका हाच नंबर अगोदरच मृत झालेल्या व्यक्तीच्या नावावर नोंद झाला. या नोंदणी क्रमांकाचा आधार घेऊन सरकारने मेंडोलिन हिला मृत असल्याचे घोषित करण्यात आले. जिवंत असतानाही कागदोपत्री मृत दाखवल्यामुळे जगाच्या कॅनव्हासवर मेंडोलिन ‘कैलासवासी’ झाली. मग काय… मेंडोलिनला ‘मी अजून जिवंत आहे’ हे सिद्ध करण्यासाठी दीर्घकाळ अशी ‘आरपार’ची लढाई करावी लागली.
सरकार दरबारी मृत्यूची नोंद झाल्यामुळे मेंडोलिनला नोकरी किंवा कोणत्याही सरकारी योजनेचा लाभ मिळत नव्हता. उलट ‘तुम्ही जिवंत आहात हे कागदोपत्री पुरावा द्या’ असा अजब सल्ला प्रत्येक ठिकाणी दिला जाऊ लागला. यामुळे जिवंत आहे, हे सबळ पुराव्यानिशी सिद्ध करण्यासाठी मेंडोलिन हिला तिच्या आयुष्यातील मौल्यवान अशी काही वर्षे वाया घालवावी लागली, तेव्हा कुठे मृत (कागदोपत्री) झालेली मेंडोलिन एक नव्हे दोन नव्हे तर तब्बल १६ वर्षांनी जिवंत झाली.
