जळगाव मिरर । २४ सप्टेंबर २०२५
शहरातील राजकीय वर्तुळात खळबळ उडवणारी घटना घडली आहे. राष्ट्रवादी काँग्रेस (अजित पवार गट) चे स्थानिक पदाधिकारी विनोद पंजाबराव देशमुख यांना तीन वर्षांपूर्वी दाखल झालेल्या गुन्ह्यात मध्यरात्री अटक करण्यात आली आहे.
सविस्तर वृत्त असे कि, दि. ३१ ऑक्टोबर २०२२ रोजी व्यावसायिक मनोज लिलाधर वाणी यांच्या कार्यालयावर झालेल्या हल्ल्याच्या प्रकरणी विनोद देशमुख यांच्याविरुद्ध दरोडा व जीवे मारण्याच्या धमकीचा गुन्हा दाखल करण्यात आला होता. हा गुन्हा १२ नोव्हेंबर २०२२ रोजी रामानंदनगर पोलीस ठाण्यात नोंदवण्यात आला होता. दरम्यान, तपासाच्या अनुषंगाने मंगळवारी (२३ सप्टेंबर २०२५) रोजी रामानंदनगर पोलीस ठाण्याचे पोलीस निरीक्षक राजेंद्र गुंजाळ व त्यांच्या पथकाने कारवाई करत देशमुख यांना अटक केली. ही कारवाई मध्यरात्रीच्या सुमारास करण्यात आल्यामुळे शहरात एकच खळबळ उडाली आहे.
सदर प्रकरणामुळे स्थानिक राजकारणात चर्चेला उधाण आले असून राष्ट्रवादी काँग्रेसच्या गोटात चिंतेचं वातावरण निर्माण झालं आहे. पुढील तपास पोलीस करत असून देशमुख यांना न्यायालयात हजर करण्यात येणार असल्याची माहिती सूत्रांनी दिली आहे.
