गॅस ग्राहकांसाठी ई-केवायसी अनिवार्य; प्रक्रिया न केल्यास सबसिडी बंद !

जळगाव मिरर | १६  मार्च २०२६

घरगुती गॅस वापरणाऱ्या कोट्यवधी ग्राहकांसाठी केंद्र सरकारने ई-केवायसी प्रक्रिया अनिवार्य केली आहे. ही प्रक्रिया वेळेत पूर्ण न केल्यास ग्राहकांना मिळणारी गॅस सबसिडी बंद होऊ शकते. तसेच दीर्घकाळ पडताळणी प्रलंबित राहिल्यास गॅस कनेक्शन निलंबित किंवा ब्लॉक होण्याची शक्यताही व्यक्त करण्यात आली आहे.

पेट्रोलियम मंत्रालयाने दिलेल्या माहितीनुसार, सबसिडीचा लाभ केवळ पात्र लाभार्थ्यांपर्यंत पोहोचावा आणि वितरण प्रक्रियेत पारदर्शकता राहावी यासाठी आधार आधारित बायोमेट्रिक प्रमाणीकरण आवश्यक करण्यात आले आहे. ग्राहकांनी ही प्रक्रिया पूर्ण न केल्यास त्यांना दर सिलिंडरमागे मिळणाऱ्या सुमारे ३०० ते ४०० रुपयांच्या सबसिडीचा लाभ गमवावा लागू शकतो. ई-केवायसी पूर्ण न केल्यास ग्राहकांना गॅस सिलिंडरची संपूर्ण किंमत भरावी लागेल. त्यामुळे दरमहा मिळणारा सबसिडीचा आर्थिक फायदा बंद होऊ शकतो. तसेच काही प्रकरणांमध्ये सिलिंडर बुकिंग स्वीकारले जाणार नाही किंवा डिलिव्हरी रद्द होण्याची शक्यता असल्याचेही सांगण्यात आले आहे. त्यामुळे आर्थिक नुकसान टाळण्यासाठी ग्राहकांनी तातडीने ई-केवायसी पूर्ण करण्याचे आवाहन करण्यात आले आहे.

घरबसल्या ‘ई-केवायसी’ करण्याची सोपी पद्धत

ग्राहक जर Indane, Bharat Gas किंवा HP Gas यापैकी कोणत्याही कंपनीचे असतील, तर ते मोबाईलवरून काही सोप्या टप्प्यांत ही प्रक्रिया पूर्ण करू शकतात.

१. ॲप डाउनलोड करा: गुगल प्ले स्टोअरवरून संबंधित गॅस कंपनीचे अधिकृत ॲप आणि Aadhaar FaceRD डाउनलोड करा.

२. लॉगिन करा: नोंदणीकृत मोबाईल क्रमांक वापरून गॅस कंपनीच्या ॲपमध्ये लॉगिन करा.

३. e-KYC पर्याय निवडा: ॲपमधील ‘e-KYC’ किंवा ‘Aadhaar Authentication’ पर्यायावर क्लिक करा.

४. फेस स्कॅन करा: FaceRD ॲपच्या मदतीने चेहरा स्कॅन करून आधार प्रमाणीकरण पूर्ण करा.

एजन्सीवरही सुविधा

ज्यांना मोबाईलवर ही प्रक्रिया करणे शक्य नाही, ते आपल्या गॅस एजन्सीवर जाऊन बायोमेट्रिक मशीनद्वारे किंवा फॉर्म भरून ई-केवायसी पूर्ण करू शकतात. ही सेवा पूर्णपणे मोफत असल्याचे स्पष्ट करण्यात आले आहे.

केवायसी न केल्यास होणारे नुकसान

• गॅस सिलिंडर बुकिंगमध्ये अडथळे येऊ शकतात

• सबसिडीचा लाभ मिळणार नाही

• सिलिंडरची पूर्ण किंमत भरावी लागू शकते

• दीर्घकाळ केवायसी प्रलंबित राहिल्यास गॅस कनेक्शन निलंबित किंवा ब्लॉक होऊ शकते

सरकारने सर्व LPG ग्राहकांना लवकरात लवकर ई-केवायसी प्रक्रिया पूर्ण करण्याचे आवाहन केले आहे, जेणेकरून सबसिडीचा लाभ कायम ठेवता येईल आणि गॅस सेवा सुरळीत सुरू राहील.