जळगाव मिरर | ६ फेब्रुवारी २०२६
मुख्यमंत्री माझी लाडकी बहीण योजनेअंतर्गत हजारो लाभार्थी महिलांना पैसे थकले होते, पण आता अखेर त्यांना दिलासा मिळणार आहे. महिला व बालविकास विभागाने ई-केवायसी दुरुस्ती पोर्टल पुन्हा सुरु केले असून महिलांना 31 मार्च 2026 पर्यंत आपले अर्ज दुरुस्त करण्याची संधी मिळणार आहे.
गेल्या काही दिवसांपासून पोर्टल बंद असल्याने राज्यभरातील अनेक भागांमध्ये महिलांनी मोर्चे काढून आपला प्रश्न मांडला होता. या आंदोलनांची दखल घेत प्रशासनाने त्वरित निर्णय घेत पोर्टल पुन्हा सुरु केला आहे.
‘मुख्यमंत्री-माझी लाडकी बहीण’ योजनेअंतर्गत लाभार्थी महिलांनी 31 डिसेंबर 2025 पर्यंत ई-केवायसीद्वारे आधार प्रमाणीकरण पूर्ण केले होते. मात्र, अर्ज भरताना कुटुंबातील सदस्य सरकारी कर्मचारी आहेत का, निवृत्तीवेतन घेत आहेत का, या बाबतीत चुकीचा पर्याय निवडल्यामुळे अनेक अर्जांवर संभ्रम निर्माण झाला होता. त्यामुळे पात्र महिलांचे पैसे थकले होते.
यापूर्वी प्रशासनाने जिल्हाधिकाऱ्यांना प्रत्यक्ष पडताळणीचे आदेश दिले होते, पण वेळखाऊ आणि अवघड प्रक्रियेमुळे महिलांना ऑनलाईन दुरुस्तीची मागणी होत होती. आता ही सुविधा पुन्हा सुरू केल्याने लाभार्थी महिलांना थेट ऑनलाईन दुरुस्ती करता येणार आहे.
महिलांनी आपले अर्ज 31 मार्च 2026 पर्यंत सुधारता येणार असून, यामुळे हजारो लाडक्या बहिणींना मोठा दिलासा मिळाला आहे आणि योजनेचा लाभ मिळण्याचा मार्ग मोकळा झाला आहे.
