जळगाव मिरर | २३ सप्टेंबर २०२५
राज्यातील कल्याण येथे एक खळबळजनक घटना घडली आहे. एका कॉंग्रेस नेत्याला भाजपच्या काही कार्यकर्त्यांनी साडी नेसविल्याचा व्हिडीओ समोर आल्याने राज्याच्या राजकारणात आता आणखी एका विषयाची ठिणगी पडणार आहे.
भाजपाच्या कल्याण-डोंबिवलीमधील कार्यकर्त्यांनी काँग्रेसचे ज्येष्ठ नेते प्रकाश पगारे यांना मानपाडा परिसरात भर चौकात साडी नेसवल्याचा प्रकार समोर आला आहे. तसेच या घटनेचा व्हिडीओ आता सोशल मीडियावरून मोठ्या प्रमाणात व्हायरल होत आहे. यानंतर कल्याणमधील काँग्रेस आक्रमक झाली असून साडी नेसवणाऱ्यांच्या विरोधात गुन्हे दाखल करून अटक करण्याची मागणी काँग्रेस जिल्हाध्यक्ष सचिन पोटे यांनी केली आहे. पंतप्रधान नरेंद्र मोदी यांचा एक साडी नेसवलेला फोटो व्हायरल केल्यामुळे भाजप कार्यकर्ते संतापले आणि त्यामुळे त्यांनी हे कृत्य केल्याचे सांगितले जात आहे.
याघटनेवरून आता भाजप आणि काँग्रेसमध्ये वाद पेटण्याची शक्यता आहे. ज्येष्ठ कार्यकर्त्याला सार्वजनिक ठिकाणी साडी नेसवत अपमानजनक वर्तन केल्याचे म्हणत काँग्रेसने या घटनेचा निषेध केला आहे. काँग्रेस जिल्हाध्यक्ष सचिन पोटे म्हणाले, घडलेली घटना अतिशय गंभीर असून साडी नेसवणाऱ्यांविरुद्ध तात्काळ गुन्हे दाखल करून अटक करा. तसेच दोषींवर कठोर कारवाई करत चांगलाच धडा शिकवला गेला पाहिजे. कार्यकर्त्यांच्या मागे काँग्रेस पक्ष उभा असून पीडित कार्यकर्त्याला पूर्ण न्याय मिळण्यासाठी सर्वतोपरी प्रयत्न करणार आहे. प्रकाश पगारेंचा इशारा – भाजप कार्यकर्त्यांच्या या कृत्यानंतर प्रतिक्रिया देताना पगारे म्हणाले, साडी नेसवा नाही तर काही करा, मी काँग्रेससाठी जीव जाईपर्यंत लढणार. या गुंडांना धडा शिकवला जाईल. पोलीस अधिकाऱ्यांनी प्राथमिक तपास सुरु केला असून आवश्यक तक्रारी प्राप्त झाल्या असल्याची नोंद दिली आहे. संबंधितांची ओळख पटवून अधिक चौकशी करण्याचे काम सुरु आहे.
