जळगाव मिरर | १८ जानेवारी २०२५
येत्या महिन्यात राज्यातील दहावी व बारावीच्या विध्यार्थ्याचे पेपर सुरु होणार आहे. तत्पूर्वी महाराष्ट्र राज्य माध्यमिक शिक्षण व उच्च माध्यमिक शिक्षण मंडळाकडून घेण्यात येणाऱ्या यंदाच्या दहावी – बारावीच्या परीक्षेच्या हॉल तिकिटावर विद्यार्थ्याच्या जात प्रवर्गाचा उल्लेख करण्यात आल्याची बाब समोर आली आहे. विविध शिक्षण तज्ज्ञ व शिक्षकांनी बोर्डाच्या या निर्णयावर हरकत नोंदवत या बदलाला विरोध दर्शवला आहे.
पुढील महिन्यापासून दहावी व बारावी बोर्ड परीक्षेला सुरुवात होणार आहे. या परीक्षेला अवघ्या काही दिवसांचा अवधी शिल्लक असताना शिक्षण मंडळाने विद्यार्थ्यांच्या हॉलतिकिटावर जातीच्या प्रवर्गाचा उल्लेख केल्यामुळे एक नवा वाद निर्माण झाला आहे. शाळेत विद्यार्थ्याच्या जातीची नोंद नेमकी कोणती झाली? हे पालक व विद्यार्थ्यांना समजण्यासाठी हॉल तिकिटावर जात प्रवर्गाचा रकाना जोडण्यात आल्याचा दावा बोर्डाने केला आहे. पण शाळेच्या दाखल्यावरून जातीची नोंद काढून टाकण्याची मागणी होत असताना बोर्डाने हा निर्णय घेतल्यामुळे त्यावर पालक व शिक्षण तज्ज्ञांनी हरकत घेतली आहे.
शिक्षणाचा मूळ उद्देश हा समाजात सामाजिक समता रुजवण्याचा आहे. पण आता बोर्डाने विद्यार्थ्यांच्या हॉल तिकिटावरच जातीच्या प्रवर्गाचा उल्लेख केल्यामुळे हा उद्देश कसा सफल होणार? असा सवाल यासंबंधी पालक व शिक्षणतज्ज्ञांनी उपस्थित केला आहे.
बोर्डाने हॉल तिकिटावर जात प्रवर्गाचा केलेला उल्लेख अत्यंत चुकीचा आहे. आपण परीक्षांमध्ये विद्यार्थ्यांची ओळख लपवून ठेवण्याचा प्रयत्न करतो. विद्यार्थ्यांची ओळख परीक्षकालाही कळू नये यासाठी रोलनंबरवरही आपण स्टिकर लावतो. त्यामु्ळे बोर्डाने हॉल तिकिटावर जात प्रवर्गाचा केलेला उल्लेख न पटणारा आहे. विशेषतः या निर्णयाखातर दिलेले स्पष्टीकरणही न पटणारे आहे. एक वेळ जातीचा उल्लेख निकालावर केला असला तर ते चालले असते. पण दाखल्यावर जात असताना पुन्हा हॉल तिकिटावर त्याचा उल्लेख करणे योग्य नाही, असे शिक्षणतज्ज्ञ हेरंब कुलकर्णी यांनी म्हटले आहे.
उल्लेखनीय बाब म्हणजे बारावी बोर्ड परीक्षेचे हॉल तिकिट सध्या वितरित केले जात आहे. तर दहावी बोर्ड परीक्षेचे हॉल तिकीट येत्या सोमवनारपासून विद्यार्थ्यांना उपलब्ध होणार आहेत. कागदपत्रावर जातीची चुकीची नोंद असेल तर पालकांना शिक्षणाधिकारी उपसंचालक कार्यालयात योग्य ती कागदपत्रे सादर करून योग्य तो बदल करून घेता येणार आहे.
