जळगाव मिरर | २५ जुलै २०२३
राज्यातील महामार्गावर गेल्या अनेक दिवसापासून अपघाताची मालिका सुरु असतांना राज्यातील बुलढाणा जिल्ह्यातून मोठी बातमी समोर आली आहे. मलकापूर- बुलढाणा बसचा भीषण अपघात झाला आहे. बसचा ब्रेक फेल झाल्याने चालकाचे बसवरील नियंत्रण सुटले. ही बस थेट राजूर घाटात पलटी झाली. बसमध्ये 55 प्रवासी प्रवास करत असल्याची प्राथमिक माहिती समोर आली आहे. या प्रवाशांमध्ये काही विद्यार्थ्यांचा देखील समावेश असल्याची माहिती आहे.
मिळालेल्या माहितीनुसार, या बसमध्ये २० विद्यार्थी असल्याची माहिती देखील मिळत आहे. स्थानिकांनी घटनास्थळी धाव घेत मदतकार्य सुरु केले आहे. ही बस मलकापूरहून बुलढाण्याकडे निघाली होती. एसटी बस क्रमांक ८३७५ या बसचा जॉईंचर निसटला होता. बस मागे जात होती. यावेळी ब्रेक लागले नाहीत. त्यामुळे चालकाचे नियंत्रण सुटले आणि अपघात झाला, अशी प्राथमिक माहिती मिळत आहे. या अपघाताची माहिती कळताच पोलिस घटनास्थळी दाखल झाले. जखमींना रुग्णवाहिकेतून रुग्णालयात पाठविले. सर्व जखमींवर बुलढाणा सामान्य रुग्णालयात उपचार सुरू असल्याची माहिती मिळाली आहे.
