अमळनेर : विक्की उत्तम जाधव
शहरातील मनोहर संकुलातील रहिवासी एलआयसीचे सहायक प्रशासन अधिकारी हिमांशू सिंह यांच्या घरातून सुमारे १ लाख ८५ हजार रुपयांची रोख रक्कम व सोन्याचे दागिने लंपास केल्याची घटना गुरुवारी सायंकाळी ६ ते ७ वाजेदरम्यान घडली. हिमांशू ओमबीर सिंह (मूळ रा. हरियाणा) हे मनोहर संकुल भगवा चौक येथून गुरुवारी सायंकाळी ७ वाजता ऑफिसमधून घरी परत आले.
त्यावेळी घराला फक्त कडी लावली होती. कपाटातील कपडे अस्ताव्यस्त पडलेले दिसले. मात्र, काही वेळाने त्यांच्या आई घरी आल्या. त्यांनी घराला कुलूप लावून बाहेर गेल्याचे सांगितले. संशय आल्याने घरातील वस्तू तपासल्या असता घरातील एकूण १ लाख ८५ हजार रुपयांचा ऐवज अज्ञात चोरट्याने चोरून नेल्याचे उघडकीस आले. अमळनेर पोलिस स्टेशनला घरफोडीचा गुन्हा दाखल करण्यात आला आहे. या प्रकरणी पुढील तपास पोलीस उपनिरीक्षक भैयासाहेब देशमुख हे करीत आहेत.
