जळगाव मिरर | २९ नोव्हेबर २०२४
राज्यातील महामार्गावर अपघाताच्या घटना होत असतांना नुकतेच गोंदिया जिल्ह्यात शिवशाही बसचा भीषण अपघात झाल्याची घटना घडली आहे. हि घटना सडक अर्जुनी तालुक्यातील खजरी व डव्वा गावाजवळ घडली असून दुचाकीला वाचवण्याच्या प्रयत्नात चालकाचा ताबा सुटल्याने ही बस उलटली. या अपघातात 12 प्रवाशांचा मृत्यू झाला. तर 16 प्रवासी जखमी झाले आहेत. काहींची प्रकृती गंभीर आहे. जखमींना उपचारासाठी जवळच्या रुग्णालयात दाखल करण्यात आले आहे.
आज दि.२९ नोव्हेबर २०२४ रोजी दुपारी 12 ते साडेबारा वाजेच्या दरम्यान शिवशाही बस ( क्रमांक एमएच 09 ईएम 1273) बस भंडाराहून गोंदियाकडे येत होती. खजरी व डव्वा गावाजवळ आल्यानंतर दुचाकी अचानक समोर आली. दुचाकी चालकाला वाचवण्याच्या प्रयत्नात चालकाचे नियंत्रण सुटल्याने ही बस उलटली. अपघातानंतर बस चालक घटनास्थळावरून फरार झाल्याचे प्रत्यक्षदर्शींकडून सांगण्यात येत आहे.
अपघाताची माहिती मिळताच पोलिस आणि प्रशासन घटनास्थळी दाखल झाले असून बसमधून मृतदेह बाहेर काढण्यात आले आहे. सध्या बचाव कार्य सुरू आहे. मृतांचा आकडा वाढण्याची शक्यता वर्तवण्यात येत आहे. दरम्यान, या अपघाताचे वृत्त समजताच काळजीवाहू मुख्यमंत्री एकनाथ शिंदे यांनी या अपघाताबद्दल स्थानिक प्रशासनाकडून माहिती घेतली. तसेच जखमी लोकांवर तातडीने आणि योग्य उपचार करावेत, अशा सूचना त्यांनी दिल्या आहेत. त्यासोबतच मृतांना तातडीने 10 लाख रुपयांची मदत देण्याचे आदेश देखील एकनाथ शिंदे यांनी दिले आहेत.
