जळगाव मिरर | ३१ मार्च २०२६
राज्यातील राजकीय वर्तुळात खळबळ उडवून देणाऱ्या नरहरी झिरवाळ यांच्या कथित व्हिडिओ प्रकरणाला आता नवे आणि धक्कादायक वळण मिळाले आहे. या व्हिडिओमध्ये दिसणाऱ्या तृतीयपंथीय व्यक्तीने स्वतःच्या सख्ख्या भावाविरोधात गंभीर तक्रार दाखल केली असून, ब्लॅकमेल करण्याच्या उद्देशाने बनावट व्हिडिओ तयार करून तो सोशल मीडियावर व्हायरल केल्याचा आरोप केला आहे.
तक्रारीनुसार, संबंधित भावाने विविध वेगवेगळ्या व्हिडिओ क्लिप्स एकत्र करून एडिटिंगच्या माध्यमातून एक दिशाभूल करणारा व्हिडिओ तयार केला. या व्हिडिओमुळे तक्रारदाराची गोपनीयता भंग झाली असून, समाजात बदनामी करण्याचा हेतू होता, असेही तिने स्पष्ट केले आहे. या आरोपांमुळे आधीच चर्चेत असलेले हे प्रकरण अधिकच गुंतागुंतीचे बनले आहे.
या संदर्भात मुंबईतील कफ परेड पोलिस ठाण्यात गुन्हा दाखल करण्यात आला आहे. पोलिसांनी भारतीय न्याय संहिता (BNS) कलम 79 आणि 351(1) तसेच माहिती तंत्रज्ञान कायद्यांतर्गत गुन्हा नोंदवून तपास सुरू केला आहे. व्हिडिओची सत्यता पडताळण्यासाठी तांत्रिक विश्लेषणही करण्यात येत असून, तो नेमका कसा तयार करण्यात आला आणि सोशल मीडियावर कसा प्रसारित झाला याचा सखोल तपास सुरू आहे.
काही दिवसांपूर्वी सोशल मीडियावर नरहरी झिरवाळ यांचा एका तृतीयपंथीय व्यक्तीसोबत असल्याचा कथित व्हिडिओ मोठ्या प्रमाणात व्हायरल झाला होता. या व्हिडिओमुळे राज्याच्या राजकारणात मोठी खळबळ उडाली होती. मात्र, झिरवाळ यांनी सुरुवातीपासूनच हा व्हिडिओ बनावट असल्याचा ठाम दावा करत, वेगवेगळ्या क्लिप्स जोडून तो तयार करण्यात आल्याचे स्पष्ट केले होते.
दरम्यान, या प्रकरणावर प्रतिक्रिया देताना देवेंद्र फडणवीस यांनी झिरवाळ यांना पोलिसांत तक्रार दाखल करण्याचा सल्ला दिला होता. संपूर्ण प्रकरणाची निष्पक्ष चौकशी होऊन सत्य समोर येईल, असा विश्वास त्यांनी व्यक्त केला.
सध्या मुंबई पोलिसांकडून या प्रकरणाचा तपास वेगाने सुरू असून, तांत्रिक पुरावे आणि साक्षीदारांच्या आधारे सत्य उलगडण्याचे प्रयत्न सुरू आहेत. चौकशी पूर्ण झाल्यानंतरच या व्हिडिओमागील खरे वास्तव समोर येणार असल्याचे पोलिसांनी सांगितले आहे.
