जळगाव मिरर | २७ मार्च २०२४
राज्यातील अनेक शहरात गुन्हेगारी घटना घडत असतांना एक थरारक घटना अहमदनगर जिल्ह्यातील पिंपळगाव लांडगा येथे घडली आहे. चारित्र्यावर संशय घेत पत्नीसह दोन अल्पवयीन मुलींना पेट्रोल टाकून जिवे मारल्याची घटना सोमवारी सकाळी पिंपळगाव लांडगा (ता. नगर) येथे घडली. पतीने दारूच्या नशेत हे कृत्य केल्याचा संशय आहे. पती सुनील गोरख लांडगे याला पोलिसांनी अटक केली आहे.
मिळालेल्या माहितीनुसार, पत्नी ललिता उर्फ ताराबाई सुनील लांडगे (३२), मुलगी साक्षी सुनील लांडगे (१४), खुशी सुनील लांडगे (१३ महिने), अशी मयत झालेल्यांची नावे आहेत. याबाबत मयत ललिता यांचे वडील भाऊसाहेब आबाजी गोरे (रा. रांजणी, ता. नगर) यांनी फिर्याद दिली. सोमवारी सकाळी सुनील लांडगे याने पत्नी व दोन मुलींना मुलींना घरात कोंडून त्यांच्या अंगावर पेट्रोल टाकून पेटवून दिले. आग एवढ्या मोठ्या प्रमाणात भडकली होती की, कुणाला तिथे जाणे शक्य होत नव्हते. त्यामुळे अग्निशमन विभागाला पाचारण केले. अग्निशमन विभागाने आग नियंत्रणात आणत घराचे कुलूप तोडून आत प्रवेश केला असता आई व दोन मुली जळालेल्या अवस्थेत आढळल्या.
