जळगाव मिरर | ४ ऑगस्ट २०२३
बॉलिवूडचे सुप्रसिद्ध कला दिग्दर्शक नितीन देसाई यांनी बुधवारी एनडी स्टुडिओमध्ये पहाटे ३.३० च्या सुमारास गळफास लावून आत्महत्या केली होती. त्यांच्यावर आज म्हणजेच शुक्रवारी दुपारी ४ वाजता अंत्यसंस्कार करण्यात येणार आहेत. त्यापूर्वी दुपारी १२ ते २ या वेळेत त्यांचे पार्थिव अंत्यदर्शनासाठी एनडी स्टुडिओमध्ये ठेवण्यात येणार आहे.
सध्या नितीन यांचा मृतदेह पोस्टमॉर्टमनंतर मुंबईतील जेजे रुग्णालयात ठेवण्यात आला आहे. पोस्टमॉर्टम रिपोर्टमध्ये मृत्यूचे कारण आत्महत्या असल्याचे सांगण्यात आले आहे. अजूनही कुटुंबातील काही सदस्यांची प्रतीक्षा आहे. जेजे रुग्णालयाशी संबंधित सूत्रांनी दिलेल्या माहितीनुसार, नातेवाईकांच्या विनंतीवरून मृतदेह शवागारात ठेवण्यात आला आहे. त्यांच्या मुलीसह कुटुंबातील काही सदस्य परदेशातून येणार आहेत. त्यांच्या आगमनानंतर पार्थिव कर्जत येथील एनडी स्टुडिओमध्ये आणण्यात येणार आहे. एनडी स्टुडिओमध्येच त्याच्यावर अंत्यसंस्कार व्हावेत, अशी नितीनच्या नातेवाईकांची इच्छा आहे. रायगडचे एसपी सोमनाथ घार्गे यांनी बुधवारी रात्री ही माहिती दिली. एसपी सोमनाथ घार्गे यांनी दिलेल्या माहितीनुसार, स्टुडिओमध्ये सापडलेले साहित्य जप्त करण्यात आले असून त्याची तपासणी करण्यात येत आहे. पोलिसांनी केअरटेकर आणि ड्रायव्हरचे जबाबही घेतले आहेत.
