जळगाव मिरर | २८ ऑक्टोबर २०२४
चोपडा शहरातील निर्मल डेअरी येथून घेतलेल्या दुधात प्लास्टिक सापडल्याचे कारण सांगून त्याचा व्हिडीओ व्हायरल करत डेअरी मालकाला धमकी देऊन ७५ हजाराची खंडणी घेतल्याप्रकरणी ऋषी संजय पाटील (२७) व उपशिक्षक संजय विक्रम पाटील (५२, दोघे रा. बिडगाव ता चोपडा ह.मु.साने गुरुजी कॉलनी, चोपडा) या पिता-पुत्रांविरोधात चोपडा शहर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, शहरातील निर्मल डेअरी येथून ऋषी संजय पाटील हा दि.१९ रोजी संध्याकाळी ६ वाजेच्या सुमारास दूध घेऊन गेला. ऋषी याने घरी दूध तापवले असता दुधावर प्लास्टिक सदृश्य साय आली. ऋषी याने त्याचा व्हिडीओ तयार करत सोशल मीडियावर व्हायरल करत तो व्हिडीओ निर्मल डेअरीचे संचालक प्रल्हाद बळीराम पाटील (५५, रा गणेश कॉलनी चोपडा) यांना टाकला आणि सांगितले की,
तुमची बदनामी थांबवायची असेल तर मला एक लाख रु द्या अन्यथा बदनामी करेल अशी व्हाट्सअपवर धमकी दिली. त्यानंतर ऋषी पाटील आणि त्याचे शिक्षक वडील संजय पाटील हे दोघे पिता पुत्र प्रल्हाद पाटील यांना डेअरीवर येऊन भेटले आणि सांगितले की, हे प्रकरण संपवा आणि मुलगा सांगतो ते करा. त्यानंतर प्रल्हाद पाटील यांनी घाबरून ऋषी पाटील याला ७५ हजार रोख रक्कम दिली. त्यानंतर ऋषीं याने दुधाबाबत कोणतीही समस्या नसल्याचे सांगून प्रकरण थांबवले. सदर प्रकरण प्रल्हाद पाटील यांनी शहर पोलिसांना सांगितले. त्यावरून दि.२६ रोजी मुलगा ऋषी पाटील आणि वडील संजय पाटील यांच्यावर चोपडा शहर पोलीस ठाण्यात खंडणीचा गुन्हा दाखल करण्यात आला आहे. पुढील तपास पोलीस उपनिरीक्षक जितेंद्र वल्टे हे करीत आहेत.
