जळगाव मिरर | १५ मे २०२५
शहरातील दूध फेडरेशन रोडवर मध्यरात्री २ वाजेच्या सुमारास एका भरधाव चारचाकीमध्ये गोळीबार होऊन एका 25 वर्षीय तरुणाच्या पाठीत उजव्या बाजूस गोळी शरीरात घुसली असून तो जखमी झाला आहे. याप्रकरणी जळगाव शहर पोलीस स्थानकात गुन्हा दाखल करण्यात आला आहे.
फिर्यादीत म्हटल्यानुसार, नाजीम फिरोज पटेल ( वय २५) हा तरुण शेप बनवण्याचा व्यवसाय करीत असून धरणगाव तालुक्यातील पाळधी येथे आई-वडील दोन भाऊ यांच्यासह वास्तव्यास आहे. दिनांक 14 मे रोजी रात्री १० वाजेच्या सुमारास नाजीम पटेल हे आपले मामा बबलू पटेल व मित्र तोहित देशपांडे, अल्ताफ शेख यांच्यासह चारचाकी क्रमांक MH.19.Q.7514 याने भुसावळ येथे एका कार्यक्रमात रात्री अकरा वाजेच्या सुमारास पोहोचले होते. दरम्यान कार्यक्रम आटोपल्यानंतर पाळधी येथे जळगाव शहरातील दूध फेडरेशन रस्त्यावरून जात असताना बबलू पटेल हे चारचाकी गाडी चालवत असताना मध्यरात्री दोन वाजेच्या सुमारास अचानक नाजीम पटेल यांच्या मागून बंदुकीची गोळी फायर करण्याचा आवाज आला आणि बंदुकीतून निघालेली गोळी नाजीम याच्या पाठीत उजव्या बाजूस शरीरात घुसली होती. घटना घडल्यानंतर लागलीच. नाजिम पटेल यांना जळगाव जिल्हा रुग्णालयात उपचारासाठी दाखल करण्यात आले आहे. यावेळी जळगाव शहर पोलीस स्थानकाचे पोलीस कर्मचारी घटनास्थळी दाखल झाले होते. रात्री उशिरा संशयित आरोपी विरोधात गुन्हा दाखल करण्यात आला असून पुढील तपास एपीआय राम शिखरे हे करीत आहे.
