जळगाव मिरर | १ डिसेंबर २०२३
भरधाव आयशरने दुचाकीला दिलेल्या धडकेने साळव्याचे माजी सरपंच मोरेश्वर लोटू अत्तरदे (वय ५०) जागीच ठार झाल्याची घटना धरणगाव ते चोपडा रोडवरील पवार पेट्रोल पंपाजवळ गुरुवारी (दि. ३०) सकाळी ६.३० वाजेच्या सुमारास घडली आहे. या वेळी नातेवाईकांची जिल्हा शासकीय वैद्यकीय महाविद्यालयात मोठी गर्दी होती.
मिळालेल्या माहितीनुसार, साळवा येथील मोरेश्वर अत्तरदे गेल्या ४ ते ५ दिवसांपासून ते नातेवाईकांकडे मुंबई येथे गेले होते. गुरुवारी सकाळी ते मुंबई येथून धरणगाव येथे आले असताना धरणगाव येथून ते त्यांच्या दुचाकीने साळवा येथे जाण्यासाठी सकाळी ६.३० वाजता निघाले. धरणगावच्या पुढे असलेल्या पवार पेट्रोल पंपाजवळ चोपड्याकडून धरणगावकडे येणाऱ्या अज्ञात आयशर ट्रकने त्यांच्या दुचाकीला जोरदार धडक दिली. या अपघातात मारेश्वर अत्तरदे यांचा जागीच मृत्यू झाला. घटनेची माहिती मिळाल्यानंतर साळवा गावातील नातेवाईकांनी घटनास्थळी धाव घेतली. त्यानंतर मृतदेह जिल्हा शासकीय वैद्यकीय महाविद्यालयात आणला. या वेळी जिल्हा शासकीय वैद्यकीय महाविद्यालयात नातेवाईकांची मोठी गर्दी झाली होती. दरम्यान, याप्रकरणी अज्ञात वाहन चालकावर धरणगाव पोलीस ठाण्यात गुन्हा दाखल करण्याचे काम रात्री उशिरापर्यंत सुरू होते