जळगाव मिरर | ६ फेब्रुवारी २०२६
पोलीस दल वा वन विभागात नोकरी लावून देण्याचे आमिष दाखवत तिघा तरुणांकडून प्रत्येकी दोन लाख रुपये उकळत ६ लाख रुपयांची फसवणूक केल्याचा प्रकार चाळीसगाव शहरात उघडकीस आला आहे. याप्रकरणी चाळीसगाव शहर पोलीस ठाण्यात एका संशयिताविरोधात फसवणुकीचा गुन्हा दाखल करण्यात आला आहे.
या प्रकरणी तालुक्यातील हिंगोणे खुर्द येथील घनशाम कैलास पाटील (वय ३०) यांनी फिर्याद दाखल केली आहे. घनशाम पाटील हे मोबाईल विक्रीचा व्यवसाय करतात. दरम्यान, संशयित कुणाल भगवान डांगर (रा. छत्रपती संभाजीनगर, सध्या रा. टाकळी प्र.चा., ता. चाळीसगाव) याने पोलीस किंवा वन विभागात नोकरी लावून देऊ शकतो, असा दावा करत घनशाम पाटील, दीपक गोपीचंद चव्हाण आणि दर्षन्न दिल्लीप चव्हाण यांचा विश्वास संपादन केला. त्यानंतर चाळीसगावातील गणेश कॉम्प्लेक्समधील देवांश मोबाईल शॉपी तसेच बँक ऑफ इंडिया परिसरात या व्यवहाराबाबत चर्चा झाली.
जून २०२४ ते ऑक्टोबर २०२४ या कालावधीत या संशयिताने तिघांकडून वेगवेगळ्या टप्प्यांत प्रत्येकी २ लाख रुपये स्वीकारले. मात्र, दीर्घ काळ उलटूनही नोकरी न मिळाल्याने आणि संशयित सतत टाळाटाळ करत असल्याचे लक्षात आल्यानंतर फसवणूक झाल्याचे या तिघांच्या लक्षात आले. त्यानंतर घनशाम पाटील यांनी चाळीसगाव शहर पोलीस ठाण्यात तक्रार दिली. त्यावरून संशयित कुणाल डांगर याच्याविरोधात फसवणुकीचा गुन्हा नोंदवण्यात आला आहे. या प्रकरणाचा तपास स.पो.नि. शंकर मुटेकर करत आहेत. दरम्यान, नागरिकांनी सरकारी नोकरी लावून देण्याच्या आमिषाला बळी पडू नये, असे आवाहन पोलीस प्रशासनाने केले आहे
