जळगाव मिरर | २२ जुलै २०२४
गो-शाळेत जमा असलेले बैल घेवून परतणाऱ्या आयशरला समोरुन भरधाव वेगाने जाणाऱ्या कंटेनरने दुभाजक ओलांडून समोरुन जोरदार धडक दिली. या विचित्र अपघातात आयशरमधील रोहिदास परशुराम चव्हाण (वय ६०, रा. मोरगाव तांडा, ता. जामनेर) हे जागीच ठार झाले, तर वाहनातील सहा जण गंभीर जखमी झाले. ही घटना रविवारी सकाळी साडेआठ वाजता राष्ट्रीय महामार्ग सहावरील सावखेडा होळ जवळ घडली.
मिळालेल्या माहितीनुसार, जामनेर तालुक्यील मोरगाव तांडा येथील शेतकऱ्यांचे बैल तस्करी करीत असल्याच्या संशयावरुन नंदुरबार येथील शहादा पोलिसांनी दीड महिन्यांपुर्वी पकडले होते. शनिवारी न्यायालयाने संबंधितांना त्यांचे बैल परत करण्याचे आदेश दिले. मात्र संपुर्ण प्रक्रिया करतांना पहाट झाल्यामुळे पहाटे पाच वाजेच्या सुमारास रोहीदास चव्हाण व त्यांचे सहकारी (एमएच ११, बीएल ३११२) क्रमांकाच्या आयशरमध्ये बैल घेवून जामनेरकडे जाण्यासठी निघाले. पारोळा ते एरंडोल दरम्यान सावखेडा होळ गावाजवळ जळगावकडून धुळ्याकडे लोखंडी पोल घेवून जाणाऱ्या (सीजी ०६, एम ११६६) क्रमांकाच्या कंटेनर दुभाजक ओलांडून कंटेनर जात असलेल्या लाईनवर आला. त्याने समोरुन येणाऱ्या आयशरला जोरदार धडक दिली.
या विचित्र अपघातात रोहीदास चव्हाण हे जागीच ठार झाले तर त्यांच्यासोबत असलेले राहुल गणपत चव्हाण, गणेश पुरा चव्हाण, राघो ओंकार चव्हाण, दारासिंग ओंकार चव्हाण, ट्राला वरील चालक व क्लिनर हे गंभीर जखमी झाले. जखमींना तात्काळ रुग्णवाहिकेतून पारोळा कुटीर रुग्णालय येथे दाखल केले असता पुढील उपचारार्थ जळगाव येथे हलवण्यात आले होते. या विचित्र अपघातात रोहिदास परशुराम चव्हाण यांचा मृत्यू झाला. याप्रकरणी राहुल चव्हाण यांनी दिलेल्या फिर्यादीवरून पारोळा पोलिसात कंटेनर चालकाविरुद्ध गुन्हा दाखल करण्यात आलेला आहे
