जळगाव मिरर | २० सप्टेंबर २०२५
पाचोरा तालुक्यातील वडगाव टेक गावात शुक्रवारी १९ सप्टेंबर दुपारी २ वाजता हिवरा नदी केटीवेअर पुराच्या पाण्यात वाहून एक १५ वर्षीय मुलगी वाहुन गेल्याची हृदयद्रावक घटना समोर आली आहे. मुली सोबत असलेल्या तिच्या मामीला वाचविण्यात यश आले आहे. घटनेची माहिती मुलीच्या चुलत आजोबांना कळताच धक्का सहन न झाल्याने तिच्या ६५ वर्षीय आजोबांचा देखील हृदयविकाराच्या झटक्याने मृत्यू झाला आहे. घटनेमुळे वडगाव टेक गावावर शोककळा पसरली असून, सर्वत्र हळहळ व्यक्त होत आहे.
सविस्तर वृत्त असे कि, पाचोरा तालुक्यातील वडगाव टेक गावात शुक्रवारी १९ सप्टेंबर रोजी दुपारी २ वाजेच्या सुमारास निकिता भालेराव (वय – १५) आणि तिची मामी सरला विलास खरे (वय -३५) या दोघी हिवरा नदी पात्राच्या केटीवेअर मध्ये कपडे धुण्यासाठी गेल्या होत्या. दरम्यान निकीता हिचा पाय घसरून ती पाण्यात पडली. सदरचा प्रकार सरला खरे यांच्या लक्षात येताच त्यांनी निकीता हिस वाचविण्याचा प्रयत्न केला. मात्र त्या अपयशी ठरल्या.
सदरचा प्रकार मा. जि. प. सदस्य पदमसिंग पाटील यांचेसह गावकऱ्यांच्या लक्षात येताच त्यांनी घटनास्थळी धाव घेतली. सरला खरे यांना मासेमारी करणारे प्रकाश पंडित भिल यांनी वाचविले. घटनेची माहिती वाऱ्यासारखी गावात पसरली असता निकिता हिचे चुलत आजोबा शामराव विठ्ठल खरे (वय – ६५ वर्ष) यांना घटनेची माहिती कळताच त्यांना हृदयविकाराचा तीव्र झटका आल्याने त्यांचा देखील मृत्यू झाला. ओलांडत असताना पाण्याचा प्रवाह अचानक वाढल्याने दोघीही वाहून गेल्या. परिसरातील ग्रामस्थांनी तात्काळ धाव घेत सरला खरे यांना सुखरूप बाहेर काढले, मात्र निकिता पुराच्या पाण्यात वाहून गेली. घटनेची माहिती मिळताच नगरपालिका आणि महसूल विभागाच्या कर्मचाऱ्यांनी घटनास्थळी धाव घेतली असून रात्री उशिरापर्यंत निकिता हिचा शोध सुरू होता.
नातीच्या दु:खाने आजोबांचा मृत्यू
एकीकडे निकिताचा शोध सुरू असतानाच दुसरीकडे या दुर्दैवी घटनेची बातमी निकिताच्या ६५ वर्षीय आजोबा श्यामराव खरे यांना कळली. नात पुराच्या पाण्यात वाहून गेल्याचा मोठा धक्का त्यांना बसला. या धक्क्यामुळे त्यांचा जागीच मृत्यू झाला. यामुळे एकाच कुटुंबावर दुहेरी दु:ख कोसळले असून वडगाव टेक गावात शोकाकूल वातावरण आहे.
मामाकडे शिकायला होती..
मुळची उत्राण ता. एरंडोल येथील रहिवासी असलेली निकिता व तिची लहान बहिण वडगाव टेक येथील विलास खरे (मामा) यांचेकडे शिक्षणासाठी आली होती. निकिता ही पाचोरा येथील जागृती विद्यालयात इयत्ता ९ वीत शिक्षण घेत होती.
