जळगाव मिरर | २० जुलै २०२६
भुसावळ कर्नाटक एक्स्प्रेसमधून रेल्वेमार्गे अनधिकृतपणे गुटख्याची वाहतूक करणाऱ्या पाचोरा येथील एका तरुणाला भुसावळ लोहमार्ग पोलिसांनी सापळा रचून ताब्यात घेतले. भुसावळ रेल्वे स्थानकावर करण्यात आलेल्या या कारवाईत १७ हजार ११२ रुपयांचा सुगंधित पानमसाला व सुगंधित तंबाखू (गुटखा) जप्त करण्यात आला असून संबंधिताविरुद्ध गुन्हा दाखल करण्यात आला आहे. या प्रकरणातील पुरवठा साखळीचा तपास लोहमार्ग पोलीस करीत आहेत.
लोहमार्ग पोलीस निरीक्षक सुधीर घायरकर यांना पाचोरा येथील एक तरुण बऱ्हाणपूरहून कर्नाटक एक्स्प्रेसने मोठ्या प्रमाणात गुटखा घेऊन येत असल्याची गोपनीय माहिती मिळाली होती. या माहितीच्या आधारे सहायक पोलीस उपनिरीक्षक नितीन पाटील यांच्या मार्गदर्शनाखाली पोलीस कर्मचारी जय कोळी, धनराज लुले, विलास जाधव आणि अंकुश लांडगे यांनी भुसावळ रेल्वे स्थानकाच्या प्लॅटफॉर्म क्रमांक ४ वर सापळा रचला.
कर्नाटक एक्स्प्रेस स्थानकात दाखल होताच पोलिसांनी दिव्यांग डब्यात संशयास्पद हालचाली करणाऱ्या तरुणाची झडती घेतली. त्याच्याकडून १७ हजार ११२ रुपयांचा सुगंधित पानमसाला तसेच त्यामध्ये मिश्रित करण्यात येणारी सुगंधित तंबाखू मोठ्या प्रमाणात आढळून आली. पोलिसांनी तत्काळ संपूर्ण मुद्देमाल जप्त करून संबंधिताला ताब्यात घेतले. जप्त करण्यात आलेला गुटखा कुठून आणण्यात आला, तो कुठे पोहोचविण्यात येणार होता आणि या अवैध व्यापारामागील मुख्य पुरवठादार कोण आहेत, याचा सखोल तपास सुरू आहे.
