जळगाव मिरर । ५ डिसेंबर २०२२
आव्हाणे परिसरातील एका हॉटेलवर दारूविक्री होत नसल्याचे सांगितल्यावरून वाळूमाफियांशी साटेलोटे असणाऱ्या तिघांनी वाद घातला. हॉटेलची मोडतोड करीत तिघांनी प्रचंड हैदोस घातला, तसेच हॉटेल मालक किरण छगन पाटील यांच्यासह त्यांच्या दोन कर्मचाऱ्यांनाही मारहाण केली. हा प्रकार पाहून संतप्त झालेल्या आव्हाणेकरांकडून धुलाई होईल, या भीतीने तिघांना काही जणांनी कोंडून ठेवल्याचा प्रकार रविवारी सायंकाळी घडला.
शिवकॉलनीतील एका जीम ट्रेनरसह तिघे जण चोपड्याहून जळगावला जात होते. आव्हाणे फाट्यावर असलेल्या एका हॉटेलवर ते थांबले. तिघांनी आधीच दारू रिचवलेली होती. त्यातच त्यांनी हॉटेल चालकाकडे दारूची मागणी केली. त्याला नकार दिल्याने तिघांनी वाद घातला. तेव्हा तिघांनी हॉटेलमध्ये धुडगूस घातला. टेबल-खुर्च्याची मोडतोड करीत हॉटेल मालक किरण छगन पाटील यांनाही मारहाण करण्यात आली, तसेच त्यांच्या हॉटेलमधील दोघा स्वयंपाकींनाही मारहाण केली.
हा प्रकार पाहून परिसरातील ग्रामस्थ संतप्त झाले. संतप्त ग्रामस्थ तिघा मद्यप्रेमींच्या धुलाईसाठी सरसावले. मात्र, काहींनी तिघांना एका रूममध्ये कोंडले आणि पोलिसांना घटना कळविली. त्यानुसार तालुका पोलिस स्टेशनचे निरीक्षक कुंभार व सहकारी घटनास्थळी दाखल झाले. तिघांना ताब्यात घेत त्यांना तालुका पोलिस स्टेशनला आणले. रात्री उशिरापर्यंत यासंदर्भात कुठलाही गुन्हा दाखल झालेला नव्हता.
