जळगाव मिरर | १४ फेब्रुवारी २०२६
पतीला मृत्यूच्या दाढेतून खेचून काढताना स्वतःचा जीव गमावणाऱ्या पत्नीची हृदयद्रावक घटना नाशिक जिल्ह्यातील सिन्नर तालुक्यातील शिंदेवाडी येथे घडली. या दुर्दैवी घटनेने संपूर्ण गावावर शोककळा पसरली आहे.
मिळालेल्या माहितीनुसार, छाया दीपक खाडे (वय 38) असे मृत महिलेचे नाव असून त्यांच्या पतीचे नाव दीपक खाडे (वय 42) आहे. शुक्रवारी सकाळी सुमारे 8 वाजता दीपक खाडे हे शेतातील विहिरीवर पिकांना पाणी देण्यासाठी गेले होते. मोटार सुरू करण्यासाठी त्यांनी स्टार्टरचे बटन दाबताच त्यांना विजेचा तीव्र धक्का बसला. ही बाब लक्षात येताच छाया खाडे यांनी क्षणाचाही विलंब न करता पतीच्या दिशेने धाव घेतली. त्यांनी जोरात ढकलून दीपक यांना विजेच्या संपर्कातून दूर केले. त्यांच्या या धाडसी कृतीमुळे दीपक खाडे यांचा जीव वाचला. मात्र, स्वतः छाया विजेच्या प्रवाहात अडकल्या आणि गंभीर जखमी झाल्या. त्यांना तातडीने सिन्नर येथील ग्रामीण रुग्णालयात दाखल करण्यात आले. मात्र वैद्यकीय अधिकाऱ्यांनी तपासून त्यांना मृत घोषित केले. पोलिसांनी या घटनेची आकस्मिक मृत्यू म्हणून नोंद केली असून पुढील तपास सुरू आहे.
गावकऱ्यांच्या माहितीनुसार, छाया खाडे या अत्यंत कुटुंबवत्सल व मनमिळाऊ स्वभावाच्या होत्या. त्यांच्या अचानक जाण्याने शिंदेवाडी परिसरात हळहळ व्यक्त केली जात आहे. छाया आणि दीपक खाडे यांना एक मुलगा आणि एक मुलगी आहे. मोठी मुलगी बारावीमध्ये शिकत असून सध्या तिची परीक्षा सुरू आहे. अशा संवेदनशील काळात मातृछत्र हरपल्याने संपूर्ण कुटुंबावर दुःखाचा डोंगर कोसळला आहे.
