जळगाव मिरर | २७ एप्रिल २०२६
चाळीसगाव ते कन्नड घाट मार्गावरील म्हसोबा मंदिराजवळ रविवारी दुपारच्या सुमारास कारचा अपघात होऊन चार जण जखमी झाल्याची घटना घडली. जखमींमध्ये एका पोलीस अंमलदाराचा समावेश असून सर्वांना तातडीने रुग्णालयात दाखल करण्यात आले आहे.
मिळालेल्या माहितीनुसार, (एमएच ०१, बीवाय ५३७१) क्रमांकाची कार चाळीसगाव शहरातून कन्नड घाटाच्या दिशेने जात होती. घाटातील धोकादायक वळणावर वाहनाचा ताबा सुटल्याने कार घसरून अडकली आणि अपघात झाला. या अपघातात धनी पोलीस ठाण्यातील पोलीस अंमलदार दिनेश बारड (वय ५१), तेजश्री बारड (वय ४८), नंदिनी बारड (वय २२) आणि वेदांत बारड (वय १८, सर्व रा. कल्याण) हे चौघे जखमी झाले. सुदैवाने जखमींची प्रकृती स्थिर असल्याची प्राथमिक माहिती आहे.
घटनेची माहिती मिळताच चाळीसगाव महामार्ग पोलीस केंद्राचे पोलीस उपनिरीक्षक शशिकांत पाटील, संदीप पाटील, पोलीस हेड कॉन्स्टेबल संदीप जगताप व अमीर तडवी तसेच ग्रामीण पोलीस स्टेशनचे पोलीस निरीक्षक नितीन पाटील यांच्या मार्गदर्शनाखाली पोलीस अंमलदार बाळू बाविस्कर व पथकाने तात्काळ घटनास्थळी धाव घेत मदतकार्य सुरू केले.
हा अपघात चाळीसगाव पोलीस केंद्रापासून सुमारे १२ किलोमीटर अंतरावर घडला. पोलिसांनी तत्परता दाखवत जखमींना तातडीने रुग्णालयात दाखल केले. सध्या त्यांच्यावर उपचार सुरू असून पुढील तपास सुरू आहे.
