जळगाव मिरर | २४ एप्रिल २०२६
जामनेर तालुक्यातील फत्तेपूर येथील राज्यमार्ग क्रं. ४४वरील तोरनाळे गावाच्या स्मशानभूमी परिसरात २२ एप्रिलला रात्रीच्या सुमारास दुचाकीला ट्रॅक्टरने दिलेल्या भीषण धडकेत पती अन् पत्नीचा दुर्दैवी मृत्यू झाला तर वर्षभराची चिमुकली सुदैवाने या अपघातातून बचावली आहे.
मिळालेल्या माहितीनुसार, छत्रपती संभाजीनगर जिल्ह्यातील सोयगाव तालुक्यातील सावळतबारा येथील रहिवासी गोपाल सुकदेव खडके हे त्यांची पत्नी सोनाली खडके व मुलगी ऋतुजा खडके यांच्यासह दुचाकी (एमएच- २०, ईवाय- १०२०) ने सावळतबारा येथे घरी जात होते. दरम्यान, तोरनाळे गावाजवळील स्मशानभूमी परिसरातून जात असताना त्यांच्या दुचाकीला टॅक्टरने धडक दिली. या भीषण अपघातात पती, पत्नी हे जागीच ठार झाले. तर एक वर्षाची ऋतुजा ही थोडक्यात बचावली. दरम्यान, अपघाताची माहिती मिळताच फत्तेपूर पोलीस ठाण्याचे हे. कॉ. प्रवीण चौधरी, पो.कॉ. चेतन तांगडे, पो.कॉ. विशाल पांढरे, पो.कॉ. अमोल परदेशी, चालक मनोज पाटील यांनी घटनास्थळी धाव घेतली. त्यानंतर जामनेर येथील शववाहिनीला प्राचारण केले. तर, ना. गिरीश महाजन यांनी आरोग्यदूत चालक जालमसिंग राजपूत यांना घटनास्थळी पाठवले.
तर, तोरनाळे येथील ग्रामस्थांच्या मदतीने मृतांना जामनेर येथील उपजिल्हा रुग्णालयात हलवण्यात आले. दरम्यान, शवविच्छेदनानंतर प्रेत नातेवाईकांच्या ताब्यात देण्यात आले. तर, २३ एप्रिलला शोकाकूल वातावरणात त्यांच्यावर सावळतबारा येथे अत्यंसंस्कार करण्यात आले. या प्रकरणी दोन्ही वाहने पोलिसांनी ताब्यात घेतली असून या घटनेचा तपास स.पो. नि. अंकुश जाधव यांच्या मार्गदर्शनात पोलीस करत आहेत.
