जळगाव मिरर | १८ सप्टेंबर २०२४
गेल्या काही दिवसापासून राज्याचे संकटमोचक मंत्री गिरीश महाजन हे सातत्याने विविध कारणाने चर्चेत येत होते. त्यांनी नुकतेच या सर्व प्रश्नावर उत्तर दिले आहे. दुसरीकडे शरद पवार जिल्ह्यात भाजप पक्षाला मोठा धक्का देण्याची तयारी करत आहेत. मंत्री गिरीश महाजन यांच्या विरोधात भाजपचे नेते तथा जिल्हा परिषदेचे माजी अध्यक्ष दिलीप खोपडे यांना शरद पवार गटाकडून उमेदवारी मिळण्याची शक्यता वर्तवली जात आहे. शरदचंद्र पवार राष्ट्रवादी काँग्रेस पक्षाचे प्रमुख शरद पवार यांची शिवस्वराज्य यात्रा ही 21 तारखेला जळगाव जिल्ह्यात दाखल होणार आहे. या यात्रेदरम्यान खोपडे यांचा पक्षप्रवेश होणार असल्याची माहिती देखील समोर आली आहे. खोपडे यांच्या प्रश्नावर गिरीश महाजन यांनी काहीही बोलण्यास नकार दिला आहे.
गेल्या सहा टर्मपासून माझ्या विरोधात अनेक जण लढून थकले आहेत. आता कोणालाही येऊ द्या, अशा शब्दात गिरीश महाजन यांनी खोपडे यांच्या प्रश्नावर प्रत्युत्तर दिले. गणपती बाप्पाचा आशीर्वाद आमच्या पाठीशी आहे. त्याला काय करायचे हे माहिती आहे. त्यामुळे आगामी विधानसभा निवडणुकीत महायुतीचे सरकार मोठ्या मताधिक्यात येणार असल्याचा दावा देखील मंत्री गिरीश महाजन यांनी केला आहे. दिलीप खोपडे यांच्याबाबत बोलण्यात मात्र त्यांनी नकार दिला. गेल्या सहा टर्म पासून आपल्या विरोधात अनेक जण लढा देऊन थकले आहेत. आता कोणालाही येऊ द्या, घोडा आणि मैदान समोरच आहे. निवडणूक संपल्यावर माझ्याशी बोला, अशी प्रतिक्रिया गिरीश महाजन यांनी माध्यमांना दिली आहे.
दिलीप खोपडे हे जळगाव जिल्ह्यातील मराठा नेते म्हणून ओळखले जातात. जामनेर मतदार संघात मराठा समाजाचे एक लाख 40 हजार मतदार आहेत. त्यामुळे दिलीप खोपडे हे मंत्री गिरीश महाजन यांच्या समोर मोठे आव्हान उभे करू शकतात, अशी शक्यता वर्तवली जात आहे. त्यात आता खोपडे हे शरद पवार यांच्या गटात प्रवेश करणे करणार असल्याने या चर्चांना अधिक बळ मिळाले आहे.
