जळगाव मिरर | १८ एप्रिल २०२६
मेहरुण परिसरातील भवानी शाळेजवळ शुक्रवारी दुपारी सव्वा वाजेच्या सुमारास शॉर्टसर्किटमुळे घराला आग लागून संसारोपयोगी साहित्य जळून सुमारे ३५ ते ४० हजार रुपयांचे नुकसान झाले. स्थानिक नागरिकांनी तत्परता दाखवत आग विझविण्याचा प्रयत्न केल्याने संभाव्य मोठी दुर्घटना टळली.
भगवान बुधा कोळी हे आपल्या कुटुंबासह येथे वास्तव्यास असून नळ फिटिंगचे काम करून उदरनिर्वाह करतात. त्यांच्या घरावर पत्र्याचे छत असलेला एक स्टोरेज रूम आहे. याच ठिकाणी संसारातील विविध वस्तू ठेवण्यात आल्या होत्या. शुक्रवारी दुपारी अचानक या रूममध्ये शॉर्टसर्किट होऊन आग लागली आणि काही वेळातच तिने भीषण रूप धारण केले.
आगीत कुलर, वॉटर प्युरिफायर (अॅक्वा गार्ड), चादरी, गाद्या, कपडे, डाळीचे डबे तसेच अन्य साहित्य जळून खाक झाले. आग लागल्याचे लक्षात येताच परिसरातील नागरिकांनी तत्काळ बादल्यांनी पाणी टाकत आग विझविण्याचा प्रयत्न सुरू केला.
दरम्यान, नगरसेवक अक्षय वंजारी यांनी अग्निशमन विभागाला माहिती दिल्यानंतर मनपा अग्निशमन दलाचे दोन बंब घटनास्थळी दाखल झाले. अग्निशमन कर्मचाऱ्यांनी वेगाने पाणी मारून आग पूर्णपणे आटोक्यात आणली. या वेळी मुख्य अग्निशमन अधिकारी अश्वजीत घरडे, केंद्र अधिकारी भारत बारी, वाहन चालक प्रकाश चव्हाण, अजय पाटील, देविदास सुरवाडे, रजनीश भावसार यांच्यासह अन्य कर्मचाऱ्यांनी मोठ्या परिश्रमाने आग विझविण्याचे काम केले. या घटनेमुळे परिसरात काही काळ भीतीचे वातावरण निर्माण झाले होते. मात्र स्थानिकांची तत्परता आणि अग्निशमन दलाच्या जलद कारवाईमुळे मोठा अनर्थ टळल्याने सर्वांनी सुटकेचा निश्वास सोडला.
