जळगाव मिरर | २६ मे २०२५
राज्यातील चित्रपटसृष्टी असो वा छोट्या पडदासाठी काम करणारे अभिनेते व अभिनेत्री नेहमीच विविध कारणाने चर्चेत येत असतांना आता मराठी अभिनेत्याचे मोबाईलवरील स्क्रीनशॉट व्हायरल झाले आहे. ‘तुझ्याशी फ्लर्ट करायची इच्छा झाली आहे, तुझा नंबर पाठव’, अशी मागणी मराठी अभिनेता सुदेश म्हशीलकर याने मराठी अभिनेत्री प्राची पिसाट हिच्याकडे केल्याचे समोर आले आहे. प्राचीने याचा स्क्रीनशॉट तिच्या सोशल मीडियावर शेअर केला आहे. तसेच यावर तिने संताप व्यक्त करत जाहीर माफीची देखील मागणी केली आहे.
प्राचीने शेअर केलेल्या स्क्रीनशॉटमध्ये सुदेश म्हशीलकर याने तिला दोन मेसेज पाठवल्याचे दिसत आहे. ‘तुझा नंबर पाठव’, तुझ्याशी फ्लर्ट करायची इच्छा झाली आहे, कसली गोड दिसतेस’, असे दोन मेसेज सुदेशने पाठवले आहेत. यावर प्राचीने म्हटले की, ‘आणि मला हा स्क्रीनशॉट पोस्ट करायची इच्छा झाली आहे, तुझ्याकडे बायकोचा नंबर असेलच. ती ही गोड आहे. तिच्याशी फ्लर्ट करायला जमतं का ते बघ. ही पोस्ट डिलीट कर असे सांगायला कुठून तरी माझा नंबर मिळवशील आणि कॉल करशीलच’, असे प्राचीने म्हटले आहे. हा स्क्रीनशॉट फेसबुकचा आहे. तसेच सुदेशने प्राचीला इन्स्टाग्रामवरही मेसेज पाठवला आहे, याचा देखील प्राचीने स्क्रीनशॉट शेअर केला आहे.
पुढे प्राचीने इन्स्टाग्रामवर स्टोरी टाकत म्हटले की, ‘मला धमकावून, प्रेशर टाकून पोस्ट डिलीट करायला व गप्प राहायला सांगितले. त्यामुळेच मला आता असे वाटतेय की ही पोस्ट माझ्या इन्स्टाग्राम फीडमध्ये असावी. माझी आता तशी इच्छा झाली आहे. चला हा विषय संपवुया… जोपर्यंत सुदेश म्हशीलकर गोड माफी मागत नाही. तोवर ही पोस्ट अशीच राहील. त्याने माझ्या नंबरवर नव्हे तर फेसबूकवर माफी मागावी. माफी मागायची इच्छा नसेल आणि तुम्हाला वेळ असेल तर इतर मुलींनी सांगितलेले तुमचे किस्सेही सांगू शकते’.
दरम्यान, सुदेशने अनेक मालिका व चित्रपटांमध्ये लहान-मोठ्या भूमिका साकारल्या आहेत. सुदेशने अभिनेत्री निवेदिता जोशी यांच्या ‘भाग्य दिले तू मला’ या मालिकेत खलनायकी भूमिका साकारली होती. यासह त्याने ‘श्रीमंत घरची सून’ व ‘अवघाची संसार’ या मालिकांमध्येही काम केले आहे. ‘स ला ते स ला ना ते’, ‘जुगाड्या’ व ‘नो प्रॉब्लेम’ या चित्रपटांमध्ये व ‘रानबाजार’ या वेब सिरीजमध्येही काम केले आहे. तर प्राचीने झी मराठीवरील ‘तू चाल पुढे’ या लोकप्रिय मालिकेत ‘तारा’ ही भूमिका साकारली होती.
