जळगाव मिरर । २३ एप्रिल २०२६
अटलांटा कन्स्ट्रक्शन प्रकरणात नगरसेवक अरविंद देशमुख यांनी काल शहर पोलीस ठाण्यात दिलेल्या तक्रारीची पोलिस प्रशासनाने अत्यंत गंभीर दखल घेतली असून आज या प्रकरणाला वेगवान वळण मिळाले आहे. शहर पोलीस ठाण्याचे सहाय्यक पोलीस निरीक्षक सुरेश आव्हाड यांनी आज सकाळी ११ वाजल्यापासून ते सायंकाळी ७ वाजेपर्यंत थेट जळगाव महानगरपालिकेत ठाण मांडून सखोल चौकशी सुरू ठेवली.
या दरम्यान आव्हाड यांनी संबंधित विभागांमधून पाच हजार कागदपत्रे, फाईल्स व कराराशी निगडीत नोंदी हस्तगत केल्याची माहिती समोर आली आहे. विशेष म्हणजे, महापालिकेच्या विविध विभागांमध्ये जाऊन त्यांनी प्रत्यक्ष तपासणी करत संबंधित अधिकाऱ्यांकडून माहिती घेतली, त्यामुळे संपूर्ण प्रशासनात एकच खळबळ उडाली होती.
अटलांटा कंपनीशी संबंधित करार, आर्थिक व्यवहार, अॅडव्हान्स रक्कम, कामांची अंमलबजावणी आणि त्यातील संभाव्य अनियमितता या सर्व बाबींचा बारकाईने तपास सुरू असल्याचे सूत्रांकडून समजते. देशमुख यांनी केलेल्या तक्रारीनंतर अवघ्या काही तासांतच पोलिसांनी घेतलेली ही तातडीची कारवाई लक्षवेधी ठरली आहे.
दरम्यान, पोलिसांनी मोठ्या प्रमाणावर कागदपत्रे जप्त केल्याने या प्रकरणाची व्याप्ती अधिक वाढण्याची शक्यता व्यक्त केली जात असून पुढील काळात आणखी धक्कादायक बाबी समोर येण्याची चिन्हे आहेत. त्यामुळे अटलांटा प्रकरण आता केवळ प्रशासकीय मर्यादेत न राहता गंभीर फौजदारी तपासाच्या दिशेने वेगाने पुढे जात असल्याचे चित्र स्पष्ट झाले आहे.
