जळगाव मिरर | १ जानेवारी २०२५
वाहनात गॅस रिफिलींग करतांना स्फोट होवून सात जणांचा मृत्यू झाल्याची दुर्देवी घटना घडली होती. मात्र त्यानंतर देखील शहरातील पिंप्राळा परिसरात घरगुती गॅस सिलींडरमधून वाहनामध्ये गॅस रिफिलींग करणाऱ्यांवर एलसीबीच्या पथकाने छापा टाकला. याठिकाणाहून ११ गॅस सिलींडरसह गॅस रिफिलींगचे साहीत्य जप्त करण्यात आले. चार जणांविरुद्ध रामानंद नगर पोलिसात गुन्हा दाखल करण्यात आला आहे.
मिळालेल्या माहितीनुसार, शहरातील ईच्छादेवी पोलीस चौकी शेजारी सुरु असलेल्या अवैध गॅस रिफिलींग सेंटवर वाहनात गॅस भरतांना सिलींडरचा स्फोट होवून सात जण मृत्यूमुखी पडल्याची घटना घडली होती. या घटनेनंतर पोलीस अधीक्षकांनी शहरातील अवैधरित्या सुरु असलेल्या गॅस रिफिलींग सेंटवर कारवाई करण्याच्या सूचना दिल्या होत्या. दरम्यान, पिंप्राळा परिसरात वाहनांमध्ये गॅस रिफिलींग होत असल्याची माहिती एलसीबीच्या पथकाला मिळाली. त्यानुसार पथकाकडून कारवाईची मोहीम राबविण्यात आली. यामध्ये गॅस रिफिलींग सेंटवर छापा टाकण्यात आला. या कारवाईमध्ये ११ घरगुती गॅस सिलींडर, पाच गॅस भरण्यासाठी लागणाऱ्या मोटारी, दोन वजन काटे असा एकूण २ लाख १ हजारांचा मुद्देमाल जप्त करण्यात आला. याप्रकरणी वसीम चंगा शहा (रा. ख्वॉजा नगर, पिंप्राळा), फिरोज अलाउद्दीन शेख (रा. पिंप्राळा हुडको), जुबेर खान उस्मान खान पठाण (रा. पिंप्राळा हुडको), अकलाख खान जहाँगीर खान (रा ख्वॉजा नगर) यांच्याविरुद्ध गुन्हा दाखल करण्यात आल आहे.
ही कारवाई उपविभागीय पोलीस अधिकारी संदीप गावित यांच्या मार्गदर्शनाखाल रामानंद नगर पोलीस निरीक्षक राजेंद्र गुंजाळ, स्थानिक गुन्हे शाखेचे उपनिरीक्षक दत्तात्रय पोटे, सफौ अतुल वंजारी रवी नरवाडे, राजेश मेढे, हरीलाल पाटील, मुरलीधर धनगर, प्रवीण भालेराव रवींद्र कापडणे, भरत पाटील यांच्यासह रामानंद नगरचे जितेंद्र राठोड, इरफान मलिक यांच्या पथकाने केली.
