जळगाव मिरर | १० मे २०२५
विनापरवानगी उभारलेल्या गतीरोधकावरुन दुचाकी उधळून आईच्या हातात असलेली पाच महिन्यांची चिमुकली रस्त्यावर पडली. यामध्ये त्या पाच महिन्यांची गायत्री संदीप सोनवणे या चिमुकलीचा दुर्देवी मृत्यू झाला. ही घटना गुरुवारी सायंकाळी पाच वाजेच्या सुमारास कानळदा – चोपडा रस्त्यावरील आमोदा-घार्डीरस्त्यावर घडली. दरम्यान, शुक्रवारी देखील याच ठिकाणी दाम्पत्य गंभीर जखमी झाले असून हे गतिरोधक जीवघेणे ठरत आहे.
सविस्तर वृत्त असे कि, जळगाव तालुक्यातील देवगाव येथे संदीप सोनवणे हे कुटुंबियांसह वास्तव्यास आहे. त्यांची पत्नी ज्योती संदीप सोनवणे या कोळन्हावी येथे माहेरी गेलेल्या असल्याने संदीप सोनवणे हे त्यांना घेण्याकरीता गेले होते. त्यांना घेवून हे दाम्पत्य आमोदाकडून देवगावकडे जात होते. यावेळी आमोदा-घार्डी या गावाजवळ प्रशासनाची कोणतीही परवानगी न घेता, उभारलेल्या गतिरोधकावर संदीप सोनवणे यांची दुचाकी आदळली, त्याचवेळी ज्योती सोनवणे यांच्या हातात असलेली त्यांची पाच महिन्याची चिमुकली गायत्री सोनवणे ही त्यांच्या हातातून रस्त्यावर पडल्यामुळे तिच्या डोक्याला गंभीर दुखापत झाली.चिमुकलीला तातडीने जवळच्या जिल्हा शासकीय वैद्यकीय महाविद्यालयात दाखल करण्यात आले. मात्र, डॉक्टरांनी तिला मृत घोषित केले. या घटनेमुळे सोनवणे कुटुंबियांवर दुःखाचा डोंगर कोसळला असून सर्वत्र हळहळ व्यक्त केली जात आहे.
या दुर्दैवी घटनेनंतर संतप्त नागरिकांनी गतिरोधकाच्या बांधकामावर प्रश्नचिन्ह उभे केले आहे. या रस्त्यालगत अनेक गतिरोधक नियमबाह्य पद्धतीने आणि धोकादायक ठिकाणी बनवलेले आहेत. त्यांच्या चुकीच्या डिझाइनमुळे अनेक अपघात होवून अनेक जण गंभीर जखमी झाले आहेत, नियमबाह्य रितीने तयार करण्यात आलेल्या गतिरोधकबाबत कारवाई करण्याची मागणी नातेवाईकांकडून करण्यात आली आहे.
