जळगाव मिरर | २१ जुलै २०२६
जळगाव जिल्ह्यातील फरार आरोपींचा शोध, अवैध शस्त्रनिर्मिती व तस्करीचे समूळ उच्चाटन करण्याच्या उद्देशाने जळगाव, नाशिक आणि धुळे पोलिसांनी मध्य प्रदेशातील बडवाणी जिल्ह्यातील पार उमरटी (ता. वरला) येथे सोमवारी पहाटे धडक ‘ऑपरेशन कॉम्बिंग’ राबविले. या कारवाईत १२ संशयितांना ताब्यात घेण्यात आले असून दोन देशी कट्टे, चार जिवंत काडतुसे, शस्त्रनिर्मितीचा कच्चा माल, ३२ संशयित मोटारसायकली आणि इतर साहित्य जप्त करण्यात आले आहे.
ही मोहीम पोलीस अधीक्षक, जळगाव यांच्या थेट नेतृत्वाखाली राबविण्यात आली. मध्यरात्री १ वाजता पोलिसांचे पथक रवाना झाले. पहाटे ४ ते सकाळी ८ या वेळेत पार उमरटी परिसरात मोठ्या प्रमाणावर शोधमोहीम राबवून संशयित घरांवर एकाचवेळी धाडी टाकण्यात आल्या.
ही कारवाई चोपडा शहर पोलीस ठाण्यातील गुन्हा क्रमांक १०३/२०१६, चोपडा ग्रामीण पोलीस ठाण्यातील गुन्हा क्रमांक २२/२०२५ तसेच नाशिक ग्रामीणमधील पवारवाडी पोलीस ठाण्यातील गुन्हा क्रमांक १७५/२०२६ या अवैध शस्त्रसाठा व शस्त्र अधिनियमाशी संबंधित गंभीर गुन्ह्यांच्या तपासासाठी करण्यात आली होती.
मोहीमेदरम्यान ४५ संशयित घरांची झडती घेण्यात आली. २० संशयितांची सखोल चौकशी करण्यात आली, तर १२ जणांना ताब्यात घेण्यात आले. चोपडा ग्रामीण पोलीस ठाण्याच्या हद्दीतील दोन संशयितांची अंगझडती घेतली असता त्यांच्याकडून दोन देशी कट्टे आणि चार जिवंत काडतुसे जप्त करण्यात आली.
याशिवाय ३२ निनावी व महाराष्ट्र नोंदणीच्या संशयित मोटारसायकली, देशी कट्टे तयार करण्यासाठी लागणारा कच्चा माल, विविध साचे व अन्य साहित्य जप्त करण्यात आले. फरार आणि संशयित २७ आरोपींच्या घरांचे आधुनिक तंत्रज्ञानाच्या सहाय्याने जिओ-टॅगिंग करण्यात आले असून त्यांच्या हालचालींवर बारकाईने लक्ष ठेवले जाणार असल्याचे पोलिसांनी सांगितले.
या कारवाईत अपर पोलीस अधीक्षक अशोक नखाते यांच्या नेतृत्वाखाली सहाय्यक पोलीस अधीक्षक सिद्धार्थ बारवाल, विविध उपविभागीय पोलीस अधिकारी, स्थानिक गुन्हे शाखेचे अधिकारी तसेच जळगाव, नाशिक आणि धुळे जिल्ह्यातील वरिष्ठ पोलीस निरीक्षक सहभागी झाले होते.
या संयुक्त मोहिमेत जळगाव जिल्ह्यातील ८ पोलीस निरीक्षक, ३५ दुय्यम पोलीस अधिकारी व २४० पोलीस कर्मचारी, नाशिक व धुळे जिल्ह्यातील प्रत्येकी सुमारे ७० पोलीस कर्मचारी अशा एकूण ४०० हून अधिक पोलीस अधिकारी व कर्मचाऱ्यांचा सहभाग होता. यासाठी २० शासकीय वाहनांचाही वापर करण्यात आला. अवैध शस्त्रनिर्मिती आणि शस्त्र तस्करीविरोधात भविष्यातही अशाच स्वरूपाच्या धडक कारवाया सुरू राहणार असल्याचा इशारा पोलिसांनी दिला आहे.
