जळगाव मिरर | ४ मे २०२४
लोकसभा निवडणुकीच्या माध्यमातून जळगाव जिल्ह्यातील राजकारण चांगलेच तापले आहे तर आता पुन्हा एकदा मंत्री गिरीश महाजन यांनी आ.एकनाथ खडसे यांच्यावर टीकास्त्र सोडले आहे.
मंत्री महाजन म्हणाले कि, राष्ट्रवादी शरद पवार गटाचे एकनाथ खडसे हे आमदार असून त्यांनी अगोदर आमदारकीचा राजीनामा द्यावा. त्यानंतर त्यांनी भाजपचे काम करावे. लोकांमध्ये गैरसमज निर्माण होतोय. कधी म्हणतात मी राष्ट्रवादीचा तर कधी म्हणतात मी भाजपचा आहे, हे नेमकं काय चालू आहे, असे म्हणत मंत्री गिरीश महाजन यांनी एकनाथ खडसेंवर निशाणा साधला.
ज्येष्ठ नेते एकनाथ खडसे यांनी काही दिवसांपूर्वी भाजपमध्ये घरवापसी करण्याचा निर्णय घेतला. मात्र अजून त्यांचा भाजपमध्ये पक्षप्रवेश झालेला नाही. त्यातच एकनाथ खडसे यांनी त्यांच्या सुनबाई रक्षा खडसे यांचा प्रचार रावेर लोकसभा मतदारसंघात सुरू केला आहे. यावरुन मंत्री गिरीश महाजन यांनी एकनाथ खडसेंवर निशाणा साधला आहे. विधानसभेला मुलगी तुतारी घेऊन उभे राहण्याच्या तयारीत आहे. खडसे यांची भूमिका संधीसाधूपणाची आहे. घरात सगळेच पक्ष ठेवायचे, असे त्यांचे सुरु आहे. त्यांनी आमदारकी आणि खासदारकीसाठी सगळ्यांचे काम करायचे. लोकांना असे राजकारण आवडत नाही, त्यामुळे त्यांनी एक भूमिका घेतली पाहिजे, अशी टीका गिरीश महाजन यांनी एकनाथ खडसे यांच्यावर केली आहे.