जळगाव मिरर | २१ नोव्हेबर २०२३ | आध्यात्मिक संस्थेच्या विश्वस्त मंडळातील कार्यकारी सदस्याला धमकावून एक कोटीची खंडणी उकळणाऱ्या संशयित कृषी अधिकारी महिलेसह तिच्या मुलास जिल्हा व सत्र न्यायालयाने बुधवार (दि. २२) पर्यंत पोलीस कोठडी सुनावली. दरम्यान, संशयितांच्या घरझडतीत १९ लाखांची रोकड पोलिसांच्या हाती लागली असून, संबंधितांच्या महागड्या तीन मोबाइलमधील आक्षेपार्ह व्हिडिओ तपासणीसाठी फॉरेन्सिक लॅबकडे पाठविण्यात आले आहेत.
सारिका सोनवणे व मोहित सोनवणे अशी कोठडी सुनावलेल्या संशयित मायलेकांची नावे आहेत. याबाबत संस्थेचे कार्यकारी सदस्य निंबा शिरसाठ (वय ५४) यांनी फिर्याद दाखल केली आहे. आक्षेपार्ह व्हिडिओ व्हायरल करण्याची धमकी देत संशयित मायलेकांनी खंडणी वसूल केल्याचा प्रकार गंगापूर रोड परिसरात घडला. याप्रकरणी गंगापूर पोलिसांनी संशयित महिला तथा कृषी अधिकारी सारिका सोनवणे व तिच्या मुलास अटक केली आहे. जिल्हा व सत्र न्यायालयाने दोघांना बुधवारपर्यंत पोलीस कोठडी सुनावली आहे. या गुन्ह्यात पोलिसांनी मायलेकाच्या आर्थिक व्यवहारांची तपासणी सुरू केली असून, त्यांच्या घरझडतीत १९ लाखांची रोकड हाती लागल्याची माहिती पोलीस सूत्रांनी दिली. दरम्यान, संशयित महिलेच्या मोबाइलचा डेटा तांत्रिक विश्लेषणासाठी फॉरेन्सिक लॅबकडे देण्यात आला आहे. तिच्या मोबाइलमध्ये असलेला आक्षेपार्ह व्हिडिओ नेमका कोणाचा आहे, तसेच हे व्हिडिओ खरे की बनावट आहेत, याबाबत पोलिसांचा तपास सुरू आहे.