जळगाव मिरर/ २४ एप्रिल २०२६
शहरातील अनधिकृत होर्डिंगवर महापालिकेच्या अतिक्रमण विभागाने पुन्हा एकदा दंडात्मक कारवाईचा बडगा उगारला आहे. शहरातील कालिंका माता चौकातील भव्य होर्डिंग आणि इच्छा देवी चौकाजवळील नमस्कार प्लाय शेजारील 3 अनधिकृत होर्डिंगप्रकरणी भंगाळे गोल्डच्या संचालकांकडून 60 हजार 180 रुपयांचा दंड वसूल करण्यात आला आहे.
शहरातील अनधिकृत होर्डिंगबाबत सामाजिक कार्यकर्ते ॲड. पियुष नरेंद्र पाटील यांनी जळगाव शहर महानगरपालिकेच्या अतिक्रमण विभागाकडे लेखी तक्रार केली होती.
या तक्रारीत त्यांनी प्रशासनाच्या दुटप्पी भूमिकेवर ताशेरे ओढले होते. प्रशासन सर्वसामान्य अतिक्रमणधारकांवर तात्काळ कारवाई करते, मग मोठ्या धनदांडग्या व्यावसायिकांना सूट का दिली जाते? असा सवाल उपस्थित करत ॲड. पाटील यांनी अतिक्रमण विभागाला धारेवर धरले होते. या तक्रारीची दखल घेत मनपा प्रशासनाने संबंधित होर्डिंग मालकांना दंड ठोठावला. त्यानुसार भंगाळे गोल्डच्या संचालकांनी 60 हजार 180 रुपयांचा धनादेश (चेक) मनपाच्या तिजोरीत जमा केला आहे.
यापूर्वी देखील हॉटेल रूपाली बाहेरील अनधिकृत होर्डिंगवर कारवाई करण्यात आली होती. त्यावेळीही 60 हजार 180 रुपयांचा दंड वसूल झाला होता. अशा प्रकारे आतापर्यंत केवळ अनधिकृत होर्डिंग प्रकरणी भंगाळे व्यावसायिकांकडून एकूण 1 लाख 20 हजार 360 रुपयांचा दंड वसूल करण्यात आला आहे. या कारवाईमुळे जळगाव शहरातील अनधिकृत होर्डिंग लावणाऱ्या व्यावसायिकांचे धाबे दणाणले असून, प्रशासनाने यापुढेही अशीच निष्पक्ष कारवाई करावी, अशी मागणी नागरिकांकडून होत आहे.
