जळगाव मिरर | ६ जून २०२५
रेल्वे सुरक्षा बलाच्या (आरपीएफ) च्या पथकाने ऑपरेशन नार्कोस अंतर्गत मोठी कारवाई केली. यामध्ये त्यांनी जळगाव रेल्वे स्थानकावरुन १ लाख २३ हजार रुपये किमतीचा ८ किलो २०० ग्रॅम गांजा जप्त केला. याप्रकरणी दोन जणांविरुद्ध गुन्हा दाखल करुन त्यांना अटक करण्यात आली आहे. त्यांना भुसावळ रेल्वे सुरक्षा बलाच्या ताब्यात देण्यात आले आहे.
रेल्वे सुरक्षा बलाकडून ऑपरेशन नार्कोस राबविण्यात आले होते. यावेळी बुधवारी दुपारच्या – सुमारास जळगाव रेल्वे स्थानकाच्या प्लॅटफॉर्म क्रमांक दोनवर एका संशयास्पद व्यक्तीला थांबवण्यात आले. त्याच्या हालचाली संशयास्पद वाटल्याने चौकशी केली असता, त्याने उडवाउडवीची उत्तरे दिली. त्याच्याकडील काळ्या बॅगेतून गांजासारखा उग्र वास येत असल्याने अधिक तपासणी करण्यात आली. तपासात त्याने आपले नाव झबी उल्ला समी उल्ला (वय २७, रा. टँक मोहल्ला, मोदी रोड, बेंगळुरू, कर्नाटक) असे सांगितले. त्याने बॅगमध्ये गांजा असल्याचे कबूल केले आणि तो कर्नाटक एक्सप्रेसने बेंगळुरूला नेण्याच्या तयारीत होता परंतू त्यापुर्वीच पोलिसांनी त्याच्या मुसक्या आवळल्या. यासोबतच, गांजा वाहतुकीत सहभागी असलेला भीमसिंह मालसिंग बारेला (वय ४२, रा. कुंड्या पाणी, ता. चोपडा, जि. जळगाव) यालाही रात्री उशिरापर्यंत अटक करण्यात आली.
तत्काळ वरिष्ठ अधिकाऱ्यांना माहिती देण्यात आली. सहायक सुरक्षा आयुक्त, भुसावळ यांनी घटनास्थळी येऊन कारवाई करण्यात आले. स्टेशनचे अधिकारी विलास फालक यांच्या उपस्थितीत इलेक्ट्रिक काट्याने गांजाचे वजन करण्यात आले. अटकेतील दोन्ही आरोपी आणि जप्त केलेला मुद्देमाल भुसावळ आरपीएफ रेल्वे पोलिसांच्या ताब्यात देण्यात आला आहे. या प्रकरणी जळगाव रेल्वे पोलीस ठाण्यात गुन्हा दाखल करण्यात आला आहे.
