अमळनेर : विक्की उत्तम जाधव
९७वे अखिल भारतीय मराठी साहित्य संमेलनाची तारीख जवळ येत असून या संमेलनाच्या तयारीचा वेग वाढला आहे. यासंदर्भात मदत व पुनर्वसन मंत्री अनिल भाईदास पाटील यांनी प्रताप महाविद्यालयात आढावा बैठक घेऊन संपूर्ण संमेलनस्थळाची पाहणी केली.
या वेळी खा. शि. मंडळाच्या कार्यालयात सर्व शासकीय अधिकाऱ्यांच्या उपस्थितीत तयारीचा आढावा घेऊन नियोजनाबाबत मंत्री अनिल पाटील यांनी विविध सूचना केल्या. बैठकीत प्रांतधिकारी तथा संमेलनाचे समन्वयक महादेव खेडकर, डिवायएसपी सुनील नंदवाळकर, तहसीलदार सुराणा, पोलीस निरीक्षक विजय शिंदे, पालिकेचे मुख्याधिकारी प्रशांत सरोदे, म. वा. मंडळाचे अध्यक्ष डॉ. अविनाश जोशी, खा. शि. मंडळाचे संचालक नीरज अग्रवाल, बांधकाम विभागाचे कार्यकारी अभियंता प्रांजल पाटील व इतर शाखा अभियंता, मंडळाचे शरद सोनवणे, संदीप घोरपडे, नरेंद्र निकुंभ, बन्सीलाल भागवत, वसुंधरा लांडगे, प्रा. शीला पाटील, स्नेहा एकतारे, प्राचार्य डॉ. ए बी. जैन यासह इतर मान्यवर उपस्थित होते. या वेळी मंत्री अनिल पाटील यांनी तयारीसाठी मायक्रो प्लॅनिंग करा, कोणतीही उणिव राहू देऊ नका, जबाबदारीचे विकेंद्रीकरण करा आदी सूचना करत तयारी कुठपर्यंत आली, आता कोणती कामे शिल्लक आहेत, याची माहिती संबंधितांकडून जाणून घेतली. तसेच केंद्रीय मंत्री तसेच मुख्यमंत्री व उपमुख्यमंत्री यांचा दौरा कसा राहिल, याशिवाय मदतीसाठी सेवेकरी, पोलीस बंदोबस्त, सुरक्षा रक्षक नेमणुकीबाबत मंत्र्यांनी अधिकारी व संबंधितांशी विस्तृत चर्चा केली.
या वेळी मंत्री पाटील यांनी काही महत्वपूर्ण सूचना ही केल्यात. मंत्र्यांनी विद्यार्थ्यांसह युवतींशी साधला संवाद मंत्री अनिल पाटील यांनी शासकीय अधिकारी व म.वा. मंडळाच्या पदाधिकाऱ्यांना सोबत घेऊन संपूर्ण साहित्य संमेलन स्थळाची पाहणी केली. या वेळी काही बदल देखील त्यांनी संबंधितांना सुचवले. दरम्यान, या पाहणीदरम्यान मंत्री अनिल पाटील यांनी महाविद्यालयातील विद्यार्थी तसेच युवतींशी संवाद साधून त्यांच्यात संमेलनाबाबत उत्सुकता देखील वाढवली.
