जळगाव मिरर | २६ एप्रिल २०२६
महाराष्ट्र नवनिर्माण सेनेच्या जळगाव लोकसभा मतदारसंघातील महत्त्वपूर्ण संघटनात्मक बैठक आज पद्मालय विश्रामगृह, नेहरू चौक येथे उत्साहपूर्ण वातावरणात संपन्न झाली. नवनिर्वाचित संपर्क अध्यक्ष श्री संदीप पाचंगे (मुंबई) व श्री आशिष साबळे (पुणे) यांच्या उपस्थितीत पार पडलेल्या या बैठकीत जिल्ह्यातील संघटनात्मक स्थितीचा सखोल आढावा घेण्यात आला.
या बैठकीत जळगाव शहरासह पाचोरा, भडगाव, चाळीसगाव, एरंडोल, पारोळा व धरणगाव या तालुक्यांतील पदाधिकाऱ्यांनी मोठ्या संख्येने सहभाग नोंदवला. तालुकानिहाय आढावा घेत प्रत्येक भागातील संघटनात्मक ताकद, अडचणी आणि पुढील नियोजन यावर सविस्तर चर्चा करण्यात आली.
संपर्क अध्यक्ष श्री संदीप पाचंगे व श्री आशिष साबळे यांनी उपस्थित पदाधिकाऱ्यांना मार्गदर्शन करताना संघटन बळकटीकरणावर विशेष भर दिला. स्थानिक पातळीवर सक्रिय राहून पक्षाची भूमिका ठळकपणे मांडण्याचे, नव्या कार्यकर्त्यांना संधी देण्याचे तसेच सभासद नोंदणी मोहिम प्रभावीपणे राबवण्याचे आवाहन त्यांनी केले. आगामी निवडणुकांच्या पार्श्वभूमीवर संघटनेची ताकद वाढवण्यासाठी प्रत्येक पदाधिकाऱ्याने जबाबदारीने काम करण्याची गरज त्यांनी अधोरेखित केली. बैठकीदरम्यान उपस्थित पदाधिकाऱ्यांनीही आपल्या भागातील प्रश्न, अडचणी व अपेक्षा मांडल्या. त्यावर मार्गदर्शन करत संपर्क अध्यक्षांनी संघटनात्मक कामात सातत्य व समन्वय राखण्याचे निर्देश दिले.
एकूणच ही बैठक संघटनेला नवसंजीवनी देणारी ठरली असून, मनसेच्या पुढील वाटचालीसाठी दिशा देणारी ठरेल, असा विश्वास उपस्थितांकडून व्यक्त करण्यात आला.
याप्रसंगी महाराष्ट्र नवनिर्माण सेनेचे जिल्हाध्यक्ष ॲड. जमील देशपांडे, ग्रामीण जिल्हाध्यक्ष गोकुंदा रोटे शहराध्यक्ष विनोद शिंदे, किरण तळले, उपमहानगराध्यक्ष श्रीकृष्ण मेंगडे. उपमहानगराध्यक्ष ललित शर्मा, राजेंद्रनिकम,आशुतोष जाधव निकम चेतन पवार एरंडोल तालुका अध्यक्ष विशाल सोनार. विकास पात्रे, खुशाल ठाकूर, राहुल चव्हाण, सतीश सैंदाणे, संजय मोती, शाखाध्यक्ष युसूफ खाटीक, बहुसंख्य महाराष्ट्र सैनिक आणि कार्यकर्ते उपस्थित होते.
