जळगाव मिरर / २० ऑक्टोबर २०२२
दिवाळीनिमित्त तरुणांसाठी मोदी सरकारने मोठी घोषणा यावेळी केली आहे. येत्या २२ पंतप्रधान नरेंद्र मोदी यांच्या हस्ते 75 हजार तरुणांना नोकऱ्यांची नियुक्तीपत्रे देण्यात येणार आहेत.याबाबत वृत्तसंस्थेने दिलेल्या बातमीत म्हटले आहे की या व्हिडिओ कॉन्फरन्सद्वारे होणाऱ्या कार्यक्रमात पंतप्रधान मोदींच्या हस्ते 75,000 तरुणांना केंद्र सरकारच्या विविध विभागांमध्ये सरकारी नोकरीतील नियुक्ती नेमणूक पत्रे देण्यात येतील. केंद्राच्या विविध विभागांमध्ये सुमारे पावणेनऊ लाख पदे रिक्त असल्याची कबुली सरकारने संसदीय अधिवेशनात राज्यसभेत दिली होती. यातील चार लाखांहून अधिक पदे 2020 पासून भरली गेल्याचाही दावा सरकारने केला आहे.
बेरोजगारीच्या मुद्द्यावरून विरोधी पक्षांतर्फे मोदी सरकारवर वारंवार टीका केली जाते. स्वातंत्र्यानंतर बेरोजगारीचा दर देशात सध्या सर्वाधिक आणि विक्रमी आहे अशीही टीका केली जाते. जूनमध्ये केंद्र सरकारने सांगितले होते की पुढच्या दीड वर्षात म्हणजे डिसेंबर 2023 पर्यंत केंद्र सरकार 10 लाख तरुणांना नोकऱ्या देईल. सर्व मंत्रालये आणि विभागातील रिक्त जागांचा आढावा घेऊन मिशन मोडमध्ये या घोषणेच्या अंमलबजावणीला सुरुवात करण्यात आली असून पंतप्रधानांच्या हस्ते येत्या 22 ऑक्टोबरला होणारा कार्यक्रम, हा या वचनपूर्तीचा शंखनाद असेल असे केंद्राचे म्हणणे आहे.
ज्या 75 हजार तरुणांची निवड करण्यात आली आहे त्यांना संरक्षण, रेल्वे, टपाल, गृह ,श्रम आणि रोजगार आदी मंत्रालयांमध्ये त्याचप्रमाणे निमलष्करी दले दले, बँका तसेच केंद्राचे विविध विभाग यामध्ये नियुक्त्या झाल्याची पत्रे सोपवण्यात येतील. मात्र या नियुक्त्या तात्पुरत्या म्हणजे कंत्राटी असतील यशस्वीपणे उमेदवारी पूर्ण करणाऱ्यांच्या कायमस्वरूपी नियुक्त्या होणार होणार अाहेत, याबाबत स्पष्ट माहिती अद्याप मिळत नाही.
पंतप्रधानांच्या या ऑनलाईन कार्यक्रमात देशाच्या विविध भागांमधून केंद्रीय मंत्री सहभागी होतील. सत्तारुढ खासदारही आपापल्या मतदारसंघांमधून यामध्ये सहभागी होतील. वाणिज्यमंत्री पीयूष गोयल महाराष्ट्र, शिक्षणमंत्री धर्मेंद्र प्रधान ओडिशा, आरोग्यमंत्री मनसुख मांडविया गुजरात, माहिती प्रसारण मंत्री अनुराग ठाकुर चंडीगढ, रेल्वेमंत्री अश्विनी वैष्णव राजस्थान, अर्थमंत्री निर्मला सीतारमण तमिळनाडू, उद्योग राज्यमंत्री महेंद्रनाथ पांडेय उत्तर प्रदेश, अर्जुन मुंडा झारखंड आणि गिरीराजसिंग बिहार, याप्रमाणे मंत्र्यांना राज्ये वाटून देण्यात आली आहेत. त्या त्या राज्याच्या राजधानीतून या व्हिडिओ कॉन्फरन्समध्ये हे मंत्री सहभागी होतील.
