जळगाव मिरर | ६ फेब्रुवारी २०२६
एरंडोल तालुक्यातील पद्मालय वनपरिक्षेत्रातील निर्जन जंगलात आढळलेल्या अर्धवट जळालेल्या महिलेच्या मृतदेहाच्या खुनाचा छडा जळगाव पोलिसांनी अवघ्या ४८ तासांत लावला असून संशयित आरोपीला अटक करण्यात आली आहे. या उल्लेखनीय कामगिरीबद्दल पोलिस दलाचे सर्वत्र कौतुक होत आहे.
पोलिसांनी दिलेल्या माहितीनुसार, ४ फेब्रुवारी २०२६ रोजी दुपारी सुमारे १२ वाजता पद्मालय ते नागदुली रस्त्यावरील जंगलात एका महिलेचा विद्रूप अवस्थेतील अर्धवट जळालेला मृतदेह आढळून आला होता. मृतदेहाची ओळख पटू नये यासाठी आरोपीने चेहरा व छातीचा भाग ज्वलनशील पदार्थ टाकून जाळण्याचा प्रयत्न केला होता. या प्रकरणी एरंडोल पोलीस ठाण्यात गुन्हा क्रमांक १६/२०२६ नोंदवून भारतीय न्याय संहिता (BNS) २०२३ च्या कलम १०३(१) व २३८ अन्वये गुन्हा दाखल करण्यात आला. घनदाट जंगल व निर्जन परिसरामुळे मृतदेहाची ओळख पटवणे हे पोलिसांसाठी मोठे आव्हान होते. मात्र मृतदेहाच्या पायाच्या नखांवरील ‘मॅजंटा’ रंगाचे नेलपॉलिश आणि डाव्या नाकपुडीतील सोन्याची मुर्नी हे महत्त्वाचे धागेदोरे ठरले. तसेच फॉरेन्सिक तज्ञांनी मृतदेहावरील अळ्यांच्या वाढीच्या आधारे मृत्यूचा कालावधी ३० किंवा ३१ जानेवारीदरम्यानचा असल्याचे निश्चित केले.
पोलीस अधीक्षक महेश्वर रेड्डी यांच्या मार्गदर्शनाखाली स्थानिक गुन्हे शाखेची चार पथके तयार करून तपास सुरू करण्यात आला. भौतिक, तांत्रिक व गोपनीय माहितीच्या आधारे पोलिसांनी गोलू उर्फ स्वप्नील अशोक पाटील (रा. पहूर, ता. जामनेर) याला ताब्यात घेतले. सखोल चौकशीत आरोपीने गुन्ह्याची कबुली दिली.
प्राथमिक माहितीनुसार, मृत महिला आकांक्षा उर्फ अजय हेमराज गेड्रे (रा. सोनसरार, खैरागड, जि. राजनांदगाव, छत्तीसगड) हिच्याशी असलेल्या प्रेमसंबंधातून झालेल्या वादातून आरोपीने डोक्यात प्रहार करून व ओढणीने गळा आवळून तिची हत्या केली. त्यानंतर पुरावा नष्ट करण्याच्या उद्देशाने मोटारसायकलमधील पेट्रोल मृतदेहावर टाकून जाळण्याचा प्रयत्न केला.
यांनी केली कारवाई !
या कारवाईत स्थानिक गुन्हे शाखेचे पोलीस निरीक्षक राहुल गायकवाड, पोलीस उपनिरीक्षक सोपान गोरे, शरद बागल, जितेंद्र वल्टे, तसेच पोलीस अंमलदार ईश्वर पाटील व विनोद पाटील यांच्यासह जळगाव पोलीस दलातील अधिकाऱ्यांनी सहभाग घेतला.
